មានមតិមួយចំនួនត្រូវបានគេលើកឡើងតាមការនិយាយតៗគ្នា ឬនៅលើប្រព័ន្ធអ៊ីនធឺណិត ដែលពេលខ្លះវាអាចបង្កឲ្យចេញជាភាពចម្រូងចម្រាសផ្នែកគំនិត។ ខាងក្រោមនេះ គឺជាគំនិតមួយចំនួន ដែលទាក់ទងនឹងបញ្ហានៅជុំវិញប្រធានបទជំងឺ COVID-19 ដែលត្រូវបានដកស្រង់ចេញពីគេហទំព័រព័ត៌មាន The Guardian ចុះផ្សាយកាលពីថ្ងៃទី២១ ខែមីនានេះ។
មតិ«ម៉ាស់ធម្មតាមិនអាចការពារអ្នកបានទេ»
ការពាក់ម៉ាស់ពេទ្យធម្មតា ពិតជាមិនអាចការពារអ្នកពីវីរុសកូរ៉ូណាបានទាំងស្រុងនោះទេ។ វីរុស អាចចម្លងនៅតាមកន្លែងផ្សេងៗទៀតបាន ដូចជាតាមភ្នែកជាដើម។ វីរុសជាច្រើន មានទំហំតូចខ្លាំងណាស់ ហើយវាអាចមានលទ្ធភាពធ្វើដំណើរ កាត់ស្រទាប់របស់ម៉ាស់ធម្មតាបាន។ ប៉ុន្តែម៉ាស់អាចមានប្រសិទ្ធភាពក្នុងការទប់ស្កាត់តំណក់ទឹកតូចៗ (ដូចជាតំណក់ទឹកមាត់នៅពេលក្អក) ដែលជាកន្លែងដែលវីរុសងាយចម្លងជាងគេ។
ការសិក្សាមួយចំនួនបានរកឃើញថា ការពាក់ម៉ាស់អាចការពារអ្នកពីជំងឺឆ្លងបានរហូតទៅ៥ដង បើប្រៀបធៀបទៅកាន់អ្នកដែលមិនមានការការពារទាំងស្រុង នៅក្នុងកាលៈទេសៈមួយចំនួន។ អ្នកជំងឺ ឬអ្នកមើលថែអ្នកជំងឺ គួរតែមានទម្លាប់ប្រើប្រាស់ម៉ាស់ជានិច្ច ព្រោះវាអាចកាត់បន្ថយភាគរយ នៃការឆ្លងបានច្រើន។ ប៉ុន្តែចំពោះការធ្វើដំណើរធម្មតា នៅតាមទីសាធារណៈ ម៉ាស់ប្រហែលជាមិនមានប្រសិទ្ធភាពអ្វីធំដុំនោះទេ។ ហេតុដូចនេះ អ្នកមិនគួរមានការព្រួយបារម្ភ ក្នុងការជាវម៉ាស់ស្តុកទុកច្រើនខ្លាំងពេកនោះឡើយ។
មតិ«វីរុសនេះបង្កទុក្ខទោសតែទៅកាន់អ្នកចាស់ជរាប៉ុណ្ណោះ មនុស្សវ័យក្មេងមិនគួរព្រួយបារម្ភពេកទេ»
ចំពោះមនុស្សវ័យក្មេងដែលនៅមានកម្លាំងពេញ ឬមនុស្សដែលមិនមានជំងឺប្រចាំកាយធំដុំ ពួកគេអាចមានលទ្ធភាពខ្ពស់ ក្នុងការប្រយុទ្ធប្រឆាំងជាមួយនឹងជំងឺ COVID-19 ។ ប៉ុន្តែបើទោះបីជាយ៉ាងនេះមែន វីរុសមួយនេះ អាចទៅបង្កឲ្យមានបញ្ហាខ្ពស់ ទៅលើប្រព័ន្ធផ្លូវដង្ហើមរបស់អ្នកដែលនៅមានកម្លាំងបាន ខ្លាំងជាងជំងឺផ្តាសាយធំធម្មតា។ ប៉ុន្តែការអនុវត្តតាមណែនាំរបស់អ្នកជំនាញ ដូចជាការតាមដានសុខភាពរបស់ខ្លួនញឹកញាប់ ឬការរស់នៅដោយដាច់ដោយឡែក (Quarantine) របស់មនុស្សវ័យក្មេងពេញកម្លាំងទាំងនោះ អាចធ្វើឲ្យល្បឿនរាតត្បាត នៃជំងឺថយចុះបានដែរ ជាពិសេសការរាតត្បាតបន្តទៅកាន់មនុស្សចាស់ជរា ដែលរស់នៅក្នុងផ្ទះតែមួយ។
មតិ«អ្នកត្រូវនៅជិតអ្នកមានផ្ទុកវីរុសរយៈពេល១០នាទីទើបឆ្លងបាន»
ចំពោះជំងឺផ្តាសាយ ការណែនាំរបស់មន្ទីរពេទ្យខ្លះបាននិយាយថា អ្នកអាចឆ្លងជំងឺនេះបានលុះត្រាតែអ្នកនៅជិតអ្នកជំងឺផ្តាសាយក្រោមចម្ងាយជិត២ម៉ែត្រ និងលុះត្រាតែអ្នកជំងឺនោះក្អក ឬកណ្តាស់លើសពី១០នាទី។ ប៉ុន្តែជារួម អ្នកអាចឆ្លងវីរុសបានរហ័សជាងនេះ ប្រសិនបើអ្នកប៉ះវត្ថុដែលមានផ្ទុកវីរុសដោយចៃដន្យមិនបានដឹង។
មតិ«វ៉ាក់សាំងនឹងត្រូវបានគេផលិតហើយក្នុងរយៈពេល២ទៅ៣ខែទៀតនេះ»
ការសិក្សាពីហ្សែន (Genes) របស់ COVID-19 ដោយគ្រូពេទ្យប្រទេសចិន ពិតជាបានជួយពន្លឿនពេលផលិតវ៉ាក់សាំងក៏ពិតមែន ដោយសារតែសព្វថ្ងៃការពិសោធន៍នៃវ៉ាក់សាំងមួយចំនួន ត្រូវបានគេកំពុងតែធ្វើទៅលើសត្វ។ ប៉ុន្តែការធ្វើតេស្តពិសោធន៍ជាច្រើនទៀត នៅតែទាមទារឲ្យមាន ជាមួយនឹងការចំណាយពេលយ៉ាងច្រើន មុននឹងវ៉ាក់សាំងនីមួយៗ អាចនឹងត្រូវបានគេប្រើប្រាស់ជាលក្ខណៈទូលំទូលាយ ដោយមិនបង្កឲ្យមានបញ្ហាសុខភាពផ្សេងៗ ទៅលើរាង្គកាយរបស់មនុស្ស។ វ៉ាក់សាំងការពារវីរុសនេះ នឹងត្រូវអាចគេចេញប្រើប្រាស់ជាទូទៅយ៉ាងលឿនបំផុត ក៏ត្រឹមមួយឆ្នាំទៀតដែរ៕