ធ្លាប់ញ៊ាំ “គ្រាប់រីករាយ” ឬអត់? ល្អណាស់ចំពោះសុខភាព ទប់ស្កាត់ជំងឺជាច្រើន

ពីនេះ ពីនោះ

សុខភាព

ធ្លាប់ញ៊ាំ “គ្រាប់រីករាយ” ឬអត់? ល្អណាស់ចំពោះសុខភាព ទប់ស្កាត់ជំងឺជាច្រើន

01, Aug 2020 , 6:59 am

រូបភាព

ដោយ: សារព័ត៌មានថ្មីៗ

ទោះបីជាធ្លាប់ ឬឧស្សាហ៍ទទួលទានគ្រាប់រីករាយញឹកញាប់ប៉ុណ្ណាក៏ដោយ ក៏ភាគច្រើននៃពួកយើងប្រហែលជាមិនធ្លាប់ដឹងទេគ្រាប់ធញ្ញជាតិនេះអាចផ្ដល់អត្ថប្រយោជន៍អស្ចារ្យចំពោះសុខភាព។ ថាតើគ្រាប់រីករាយអាចផ្ដល់ផលល្អៗអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរទទួលទានគ្រាប់រីករាយ ៖

១. វាជួយគ្រប់គ្រងកម្រិតនៃជាតិស្ករក្នុងឈាម

ជាអាហារសម្រន់ដ៏ល្អបំផុតមួយសម្រាប់អ្នកជំងឺទឹកនោមផ្អែម ក៏ព្រោះគ្រាប់ធញ្ញជាតិនេះមានផ្ទុកសម្បូរទៅដោយប្រូតេអ៊ីន ព្រមទាំងជាតិខ្លាញ់ polyunsaturated និង monounsaturated ដែលជួយបញ្ចុះកម្រិតកូឡេស្តេរ៉ូលមិនល្អ ហើយកាត់បន្ថយហានិភ័យនៃបញ្ហាសុខភាពផ្សេងៗដែលអាចកើតឡើងដោយសារជំងឺទឹកនោមផ្អែម។ ម្យ៉ាងវិញទៀត គ្រាប់ផ្ការីករាយមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ និងជាតិសសៃ ដែលជួយគ្រប់គ្រងកម្រិតនៃជាតិស្ករក្នុងឈាម។

២. វាជាប្រភពដ៏ប្រសើរនៃសារធាតុចិញ្ចឹមសំខាន់ៗ

គ្រាប់រីករាយជាប្រភពដ៏ល្អបំផុតមួយនៃជាតិសសៃ ប្រូតេអ៊ីន កាបូអ៊ីដ្រាត ខ្លាញ់ល្អ ប៉ូតាស្យូម ផូស្វ័រ វីតាមីន A វីតាមីន B6 ទង់ដែង និងម៉ង់កាណែស។ គ្រាប់ធញ្ញជាតិនេះថែមទាំងមានផ្ទុកកាឡូរីទាបទៀតផង។

៣. វាជួយបញ្ចុះកម្រិតកូឡេស្តេរ៉ូលមិនល្អ

នេះក៏ព្រោះតែគ្រាប់រីករាយមានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលជួយការពារកោសិកាពីរ៉ាឌីកាល់សេរី និងបន្ថយកម្រិតនៃកូឡេស្តេរ៉ូលមិនល្អ។

៤. វាជួយពង្រឹងសុខភាពភ្នែក

គ្រាប់រីករាយក៏ជាប្រភពដ៏ប្រសើរនៃសារធាតុ lutein និង zeaxanthin ដែលល្អសម្រាប់សុខភាពពង្រឹងសុខភាពភ្នែក។

៥. វាល្អសម្រាប់ប្រព័ន្ធរំលាយអាហារ

នេះក៏ព្រោះតែគ្រាប់រីករាយមានផ្ទុកសម្បូរទៅដោយជាតិសសៃដែលល្អសម្រាប់ប្រព័ន្ធរំលាយអាហារ។

៦. វាជួយឱ្យឆាប់គេងលក់

គ្រាប់រីករាយក៏មានផ្ទុកមេឡាតូនីនដែលនឹងជួយឱ្យអ្នកឆាប់គេងលក់។ ការទទួលទានគ្រាប់ធញ្ញជាតិនេះមុនពេលចូលគេងអាចជួយដោះស្រាយបញ្ហាពិបាកគេងលក់គួរឱ្យកត់សម្គាល់៕

សម្គាល់៖ ចូរជ្រើសរើសគ្រាប់រីករាយគ្មានជាតិប្រៃ ឬអំបិល ហើយអ្នកក៏មិនគួរទទួលទានលើសពី ១ ក្ដាប់ដៃពេញក្នុងមួយថ្ងៃដែរ៕

ត្រួតពិនិត្យដោយ www.health.com.kh