ជាតិ
ពលរដ្ឋក្រីក្រនៅសៀមរាប អាចដាក់ស្នើសុំប្រវាស់គោ និងពពែ ពីអង្គការគោសប្បុរសដើម្បីកម្ពុជា
04, Nov 2020 , 8:59 am
កសិដ្ឋានចិញ្ចឹមគោរបស់អង្គការសប្បុរសដើម្បីកម្ពុជា (រូបភាព៖ លោក ចាន់ វិចិត្រ)
×![]()
ពលរដ្ឋដែលមានជីវភាពខ្វះខាត នៅក្នុងខេត្តសៀមរាប អាចដាក់ស្នើសុំប្រវាស់ ពូជមេគោ និងពពែ ពីអង្គការគោសប្បុរសដើម្បីកម្ពុជា ដែលមានស្នាក់នៅស្រុកបន្ទាយស្រី ខេត្តសៀមរាប។ តាមលោក ចាន់ វិចិត្រ គម្រោងផ្តល់គោដល់ពលរដ្ឋនេះ គឺដើម្បី លើកស្ទួយវិស័យកសិកម្ម និងជួយឲ្យពលរដ្ឋដែលខ្វះខាតមានជីវភាពធូរធារ ដោយមិនបាច់ធ្វើចំណាកស្រុក។
អង្គការគោសប្បុរសដើម្បីកម្ពុជា ជាអង្គការមួយដែលផ្តល់ពូជមេគោ និងពពែដល់ពលរដ្ឋក្រីក្រ ក្នុងខេត្តសៀមរាប។ កសិដ្ឋានចិញ្ចឹមគោ និងពពែ របស់អង្គការសប្បុរសដើម្បីកម្ពុជា មានទំហំ ២០ហិកតា ស្ថិតក្នុងភូមិអូរម្នាស់ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប។ លោក ចាន់ វិចិត្រ ជានាយកប្រតិបត្តិនៃអង្គការគោសប្បុរសដើម្បីកម្ពុជា បានប្រាប់សារព័ត៌មាន Thmeythmey25ថា បច្ចុប្បន្នកសិដ្ឋានមានពូជមេគោប្រមាណ ១២០ក្បាល និងពពែចំនួន ១០០ក្បាល។
(រូបភាព៖ លោក ចាន់ វិចិត្រ)
បើតាម លោក ចាន់ វិចិត្រ ប្រជាពលរដ្ឋដែលមានជីវភាពខ្វះខាត ហើយមានបំណងចិញ្ចឹម អាចដាក់ពាក្យស្នើសុំមេគោទៅចិញ្ចឹមបាន ដោយមួយគ្រួសារ ទទួលបានមេគោដែលមានទម្ងន់ស្រាប់ចំនួនមួយក្បាល ដើម្បីចិញ្ចឹមរយៈ ពេល៣ឆ្នាំ។ លោក ចាន់ វិចិត្រ បានប្រាប់សារព័ត៌មានThmeyThmey25 ថា៖«ពលរដ្ឋមួយគ្រួសារ ទទួលបានមេគោមួយក្បាល។ ជាដំណាក់កាល ក្នុងរយៈពេល ៣ឆ្នាំ ពលរដ្ឋ នឹងទទួលបានកូនគោ ២ក្បាល ហើយអង្គការទទួលបាន កូនគោ ១ក្បាល»។
គម្រោងផ្តល់មេគោនេះ ក៏នឹងពង្រីកឲ្យបានច្រើនទៅស្រុកផ្សេងៗទៀតដែរ។ នេះបើតាមលោក ចាន់ វិចិត្រ ដោយលោកបន្តឲ្យដឹងថា ក្រៅពីគម្រោងចិញ្ចឹមគោ អង្គការក៏មានការផ្ដល់នូវសត្វពពែដែរ ប៉ុន្តែពិបាកចិញ្ចឹមជាងសត្វគោបន្តិច និងម្យ៉ាងពលរដ្ឋនិយមចិញ្ចឹមគោជាង។
អង្គការគោសប្បុរសដើម្បីកម្ពុជា បានបង្កើតឡើងនៅឆ្នាំ ២០១៣ ដើម្បីជួយឲ្យពលរដ្ឋដែលខ្វះខាតក្នុងខេត្តសៀមរាបមានជីវភាពធូរធារ លើកស្ទួយវិស័យកសិកម្ម និងមិនបាច់ធ្វើចំណាកស្រុក។ មកដល់បច្ចុប្បន្នមានប្រជាពលរដ្ឋ ២៥០គ្រួសារហើយ ដែលរស់នៅក្នុងស្រុកកបន្ទាយស្រី និងស្រុកប្រាសាទបាគង បានអាស្រ័យផលពីការចិញ្ចឹមគោ ដែលទទួលបានពីអង្គការ។
អង្គការគោសប្បុរសដើម្បីកម្ពុជា មានការគាំទ្រពីក្រសួងកសិកម្ម រុក្ខាប្រមាញ់និងនេសាទ ក៏ដូចជាសប្បុរសជនក្រៅស្រុក ពិសេសប្រទេសអូស្ត្រាលី។ សកម្មភាពទាំងនេះបានជួយលើកស្ទួយសេដ្ឋកិច្ចពលរដ្ឋក្នុងខេត្តសៀមរាបទាំងមូលឲ្យមានភាពប្រសើរឡើង៕
Tag:
ចិញ្ចឹមគោ
ក្របី
ពពែ
ចាន់ វិចិត្រ
បន្ទាយស្រី
© រក្សាសិទ្ធិដោយ thmeythmey.com
