អន្តរជាតិ
លោក ត្រាំ ថា លោកគ្មានថ្ងៃព្រមទទួលស្គាល់ជ័យជម្នះលោក បៃឌិន ឡើយ
30, Nov 2020 , 10:59 am
លោក ដូណាល់ ត្រាំ ប្រធានាធិបតីជិតផុតអាណត្តិអាមេរិក ថ្លែងទៅកាន់អ្នកកាសែតនៅសេតវិមានកាលពីពេលកន្លងទៅ ។ រូបភាព៖ AFP
×![]()
ក្នុងកិច្ចសម្ភាសទូរទស្សន៍លើកទីមួយចាប់តាំងពីបរាជ័យការបោះឆ្នោតប្រធានាធិបតី លោក ដូណាល់ ត្រាំ នៅថ្ងៃទី ២៩ ខែវិច្ឆិកា បានបញ្ជាក់ថា លោកគ្មានថ្ងៃព្រមទទួលស្គាល់ជ័យជម្នះរបស់បេក្ខជនបក្សប្រជាធិបតេយ្យ ចូ បៃឌិន ហើយលោកក៏មិនព្រមបោះបង់ចោលការចោទប្រកាន់ថា ការបោះឆ្នោតមានការលួចបន្លំផងដែរ។ 
«វាមិនងាយដែលអ្នកនឹងផ្លាស់ប្តូរគំនិតខ្ញុំបានឡើយ។ គំនិតខ្ញុំ នឹងមិនប្រែប្រួលក្នុងពេល៦ខែ»។ លោក ដូណាល់ ត្រាំ បានបញ្ជាក់បែបនេះ ក្នុងកិច្ចសម្ភាសជាមួយទូរទស្សន៍អាមេរិក Fox News នៅថ្ងៃទី២៩ ខែវិច្ឆិកា។ លោកក៏នៅតែចោទប្រកាន់គ្មានភស្តុតាងថា ការបោះឆ្នោត មានការលួចបន្លំទាំងស្រុង ហើយបើរាប់តែសន្លឹកឆ្នោតស្របច្បាប់ លោកឈ្នះឆ្នោតយ៉ាងស្រួល។
ទោះជាលោក ត្រាំ បន្តវាយប្រហារលើសុក្រឹតភាពរបស់ប្រព័ន្ធបោះឆ្នោតអាមេរិក ក្រុមការងារផ្នែកច្បាប់លោក ពុំទាន់ផ្តល់ភត្តុតាងជាក់លាក់ណាមួយដែលអាចយកទៅតតាំងក្នុងតុលាការនោះឡើយ។ ការប្ដឹងតវ៉ាប្រឆាំងលទ្ធផលឆ្នោតរបស់លោកត្រាំ និងក្រុមការងារលោក ត្រូវបានចៅក្រុមច្រានចោលជាបន្តបន្ទាប់នៅទូទាំងប្រទេស។
ការបាក់មុខចុងក្រោយរបស់លោកត្រាំ កើតឡើងក្រោយតុលាការកំពូលរដ្ឋ Pennsylvania កាលពីថ្ងៃសៅរ៍ ទី២៨ ខែវិច្ឆិកា បានទម្លាល់ចោលការប្ដឹងតវ៉ារបស់ក្រុមអ្នកគាំទ្រលោក ត្រាំ ដែលព្យាយាមប្រឆាំងនឹងជ័យជម្នះរបស់លោក បៃឌិន ក្នុងរដ្ឋនេះ។
ក្នុងកិច្ចសម្ភាសរយៈពេល៤៥នាទី លោក ត្រាំ បញ្ជាក់ថា លោកព្យាយាមដាក់បញ្ចូលភស្តុតាង តែចៅក្រុមមិនអនុញ្ញាត ហើយថា៖«យើងមានភស្តុតាងច្រើនណាស់»។ ម្យ៉ាងវិញទៀត លោកខកចិត្តដែលក្រសួងយុត្តិធម៌ និងទីភ្នាក់ងារសហព័ន្ធស៊ើបអង្កេត (FBI) មិនជួយលោក។ «ពួកគេអត់ធ្វើអ្វីទាំងអស់»។ លោក ត្រាំ លើកឡើងបែបនេះ មុននឹងបន្ថែមថា តុលាការកំពូលគួរតែចូលមកធ្វើអន្តរាគមន៍ បើមិនដូច្នេះ អ្វីជាតួនាទីរបស់តុលាការកំពូល។
លោក បៃឌិន បានឈ្នះប្រតិភូបោះឆ្នោត ៣០៦ ទល់នឹងលោក ត្រាំ ២៣២។ ដើម្បីក្លាយជាម្ចាស់សេតវិមាន បេក្ខជន ត្រូវការសន្លឹកឆ្នោតពីប្រតិភូបោះឆ្នោតយ៉ាងតិច ២៧០ ។ សន្លឹកឆ្នោតរបស់ប្រជាជនអាមេរិក ជាអ្នករើសប្រតិភូបោះឆ្នោតតាមរដ្ឋ តែពុំកំណត់លទ្ធផលអ្នកឈ្នះឡើងធ្វើជាប្រធានាធិបតីឡើយ។ ទោះជាមិនរើសប្រធានាធិបតីដោយផ្ទាល់ក្តី សន្លឹកឆ្នោតពលរដ្ឋ តំណាងឲ្យនិមត្តិរូបនយោបាយមួយ។ តាមលទ្ធផលចុងក្រោយ លោក បៃឌិន ក៏ឈ្នះឆ្នោតដែលបោះដោយពលរដ្ឋអាមេរិក ជាមួយលទ្ធផល៥១ទល់នឹង៤៧ភាគរយ។
កន្លងមក បេក្ខជនចាញ់ឆ្នោតប្រធានាធិបតីអាមេរិក តែងប្រកាសព្រមទទួលស្គាល់លទ្ធផលភ្លាមៗ ហើយសហការក្នុងដំណើរការផ្ទេរអំណាច។ ក៏ប៉ុន្តែលោក ត្រាំ ជាង៣សប្ដាហ៍មកហើយ នៅតែរឹងរូស ទោះបីជាកាលពីសប្ដាហ៍មុន ព្រមបើកផ្លូវឲ្យលោកបៃឌិនដំណើរការផ្ទេរអំណាចផ្លូវការ។ ប្រតិភូបោះឆ្នោតទាំង៥៣៨ នឹងជួបគ្នា នាថ្ងៃទី ១៤ ខែធ្នូ ដើម្បីបោះឆ្នោតកំណត់ជ័យជម្នះជាផ្លូវការរបស់លោក បៃឌិន មុនពេលបេក្ខជនបក្សប្រជាធិបតេយ្យមួយនេះ នឹងត្រូវស្បថចូលកាន់តំណែងនាថ្ងៃទី ២០ ខែ មករា៕
Tag:
ដូណាល់ ត្រាំ
ចូ បៃឌិន
ការបោះឆ្នោតអាមេរិក
© រក្សាសិទ្ធិដោយ thmeythmey.com
