ជាតិ
លោក ហេង ណាគ្រី កំពុងជោគជ័យក្នុងរបរចិញ្ចឹមរុយផលិតចំណីសត្វ
05, Dec 2020 , 10:29 pm
×![]()
សៀមរាប៖ ការចិញ្ចឹមរុយ បានក្លាយជារបរថ្មីមួយបែបទៀតសម្រាប់កសិករ។ រុយដែលពងជាដង្កូវ ក្លាយជាចំណីសត្វដ៏ពិសេសមួយ ដែលជួយឱ្យកសិករអាចផលិតចំណីសត្វដោយខ្លួនឯង កាត់បន្ថយការទិញចំណីពីខាងក្រៅមួយផ្នែកធំ។ លោក ហេង ណាគ្រី គឺជាកសិករ និងជាមនុស្សដំបូងគេនៅកម្ពុជា ដែលចាប់ផ្តើមចិញ្ចឹមរុយធ្វើចំណីសត្វ ហើយសព្វថ្ងៃរបរនេះកំពុងជោគជ័យគួរឱ្យកត់សម្គាល់។
សត្វរុយជាច្រើនពាន់ក្បាល ត្រូវបានគេចិញ្ចឹមនៅក្នុងកសិដ្ឋានមួយកន្លែងនាស្រុកពួក។ លោក ហេង ណាគ្រី គឺជាម្ចាស់កសិដ្ឋាន ដែលសាកល្បងចិញ្ចឹមរុយនេះ អំឡុងខែមេសា ឆ្នាំ២០២០ ហើយសព្វថ្ងៃម្ចាស់កសិដ្ឋានរូបនេះ បានក្លាយជាអ្នកចែករំលែកចំណេះដឹងការចិញ្ចឹមរុយដល់កសិកររាប់សិបនាក់តាមបណ្ដាខេត្តជុំវិញប្រទេស ដែលចាប់អារម្មណ៍ការចិញ្ចឹមសត្វមួយនេះ។
រំឭកទៅគ្រាដើម លោក ហេង ណាគ្រី ចាប់ផ្តើមគិតពីការចិញ្ចឹមសត្វរុយនេះក្រោយស្រាវជ្រាវ និងឃើញការ តាមប្រព័ន្ធផ្សព្វផ្សាយបរទេស។ ក្រោយស្វែងរកនៅក្នុងស្រុកថាមិនធ្លាប់មានអ្នកចិញ្ចឹម ឬក៏មានពូជរបស់វា លោក ណាគ្រី ស្វះស្វែងរកដល់ប្រទេសវៀតណាម។ យ៉ាងណា លោកត្រូវព្យាយាមរហូតដល់៤ខែ ទើបជោគជ័យលើការចិញ្ចឹមរុយបាន។ លោកបន្ថែមថា៖« ការដឹកពីវៀតណាមមក (អំឡុងពេលនោះ) ក៏ពិបាក ខ្ញុំទិញអស់លុយច្រើនទម្រាំតែធ្វើបាន...ដំបូងខ្ញុំទិញពងរុយ៨ខាំ ដែលមួយខាំតម្លៃ១០០ដុល្លារ ខ្ញុំទិញអស់រាប់ពាន់ ទិញអាមេពូជក៏ទិញ តែងាប់អស់»។
សព្វថ្ងៃ បុរសវ័យ៥០ប្លាយរូបនេះ បានយកអាងដែលលោកធ្លាប់ចិញ្ចឹមអន្ទង់ មករៀបចំមួយផ្នែកសម្រាប់ចិញ្ចឹមរុយនិងដង្កូវ។ បច្ចុប្បន្នលោកមានមេពូជរុយប្រមាណ២០ម៉ឺនក្បាល ដែលអាចពងចន្លោះពី១ខាំទៅ៥ខាំក្នុងមួយថ្ងៃ។ ពង១ខាំលោកលក់ចេញ ៧០ដុល្លារ។ ជារៀងរាល់ថ្ងៃ លោកលក់បានចាប់ពី១ខាំទៅ៣ខាំ និងសល់ពីនោះ លោក ណាគ្រី ទុកចិញ្ចឹមខ្លួនឯង។ ក្រៅពីពងរុយ កសិកររូបនេះក៏មានលក់ប្រភេទដង្កូវដែលមានអាយុ១២ទៅ១៥ថ្ងៃ (ពេញវ័យ) ក្នុងមួយគីឡូក្រាមតម្លៃ ៤ពាន់រៀល។ មួយថ្ងៃលោកអាចលក់ប្រភេទដង្កូវពេញវ័យ ចាប់ពី១០០ទៅ២០០គីឡូក្រាម។ និងប្រភេទមេដង្កូវជិតកើតរុយ ដែលលក់បានក្នុងមួយគីឡូក្រាមតម្លៃ ១០ដុល្លារ។
តាមការបញ្ជាក់ពីអ្នកចិញ្ចឹមរុយ ដែលស្ថិតនៅភូមិព្រៃធ្លក ឃុំខ្នាត ស្រុកពួក វដ្ដជីវិតរបស់រុយដែលគេឱ្យឈ្មោះថា «រុយទាហានខ្មៅ» គឺមានរយៈពេល ៤៥ថ្ងៃ។ រុយប្រភេទនេះ នឹងស្លាប់ទៅវិញក្រោយវាពងបានម្ដង។
«ប្រយោជន៍នៃការចិញ្ចឹមរុយនេះ គឺទី១ ជួយយើងឱ្យផុតពីខាត (បង្កើតចំណីចិញ្ចឹមសត្វដោយខ្លួនឯង) ប្រយោជន៍ទាំងបរិស្ថាន ឱ្យកាកសំណល់ថយចុះ យើងយកកាកសំណល់មកច្នៃជាចំណីរបស់ដង្កូវ...ទី២ កាត់បន្ថយចំណាយ ថ្លៃដើមថោក យើងចិញ្ចឹមអ៊ីក៏ចំណេញដែរ»។ នេះជាការពន្យល់របស់លោក ណាគ្រី។
សម្រាប់លោក ណាគ្រី ការចិញ្ចឹមរុយឬប្រភេទដង្កូវនេះ ជាការងាយស្រួល មិនសូវនឿយហត់ ត្រូវការទីតាំងតូចល្មម និងចំណាយថ្លៃដើមសម្រាប់ចិញ្ចឹមតិច។ លោកពន្យល់ថា កសិករអាចចាប់ផ្តើមចិញ្ចឹមរុយនេះបាន ហើយលោកនឹងចែករំលែកបច្ចេកទេសចិញ្ចឹមដោយមិនគិតថ្លៃឡើយ។ លោកបន្ថែម៖« ភាគច្រើនខ្ញុំណែនាំគាត់កុំចិញ្ចឹមសាកល្បង ធ្វើឱ្យច្បាស់លាស់ ហ្មត់ចត់ ហើយខ្ញុំនឹងជួយគាត់ បើទិញពងរុយខ្ញុំទៅម្ដងចឹង បែរជាងាប់ ខ្ញុំអត់ឱ្យអស់លុយទៀតទេ ឱ្យពូជថែម តែកន្លងមកមិនដែលខូចទេ (ជោគជ័យទាំងអស់)»។
លោក ហេង ណាគ្រី បន្ដលើកទឹកចិត្តដល់កសិករឯទៀតឱ្យចិញ្ចឹមរុយយ៉ាងដូច្នេះថា៖« បើខំរៀនធ្វើដូចខ្ញុំ គឺជោគជ័យទាំងអស់ ពេលគាត់បានហើយមិនមែនសំខាន់លក់ពងបានលុយទេ យើងយកភ្ញាស់ជាដង្កូវយកឱ្យសត្វដែលយើងចិញ្ចឹមខ្លួនឯង មានកង្កែប ត្រី កន្ធាយ បង្កង មាន់ ទា ជ្រូក ស៊ីបាន ចំណេញទាំងអស់»៕
Tag:
កសិកម្ម
ចិញ្ចឹមរុយ
ដង្កូវ
© រក្សាសិទ្ធិដោយ thmeythmey.com
