អន្តរជាតិ
នយោបាយអន្តរជាតិ
ជប៉ុន នឹងបំពាក់រ៉ាដា Aegis លើនាវាចម្បាំងដើម្បីបាញ់ស្ទាក់មីស៊ីលកូរ៉េខាងជើង 07, Dec 2020 , 10:59 pm
នាវាសង្គ្រាមជប៉ុន ដែលមានបំពាក់ប្រព័ន្ធរ៉ាដា «Aegis» ស៊េរីចាស់ ចតនៅទីក្រុង Yokohama កាលពីថ្ងៃខែមីនា ឆ្នាំ២០២០ ។ រូបពី Kyodo
× ជប៉ុន នឹងបំពាក់ប្រព័ន្ធរ៉ាដា «Aegis» ដ៏មានឥទ្ធិពលថ្មីលើនាវាចម្បាំងរបស់ខ្លួនដើម្បីត្រៀមលក្ខណៈក្នុងលក្ខខណ្ឌដែលកូរ៉េខាងជើងបាញ់មីស៊ីលបាលីស្ទិកតម្រង់មករកជប៉ុន។ នេះបើតាមការចុះផ្សាយរបស់កាសែតជប៉ុន Asahi នៅថ្ងៃទី ៧ ខែធ្នូ ។ គម្រោងនេះ ធ្វើឡើងក្រោយរដ្ឋាភិបាលជប៉ុនបានលុបចោលផែនការដាក់ពង្រាយប្រព័ន្ធរ៉ាដាប្រភេទនេះនៅមូលដ្ឋានយោធាចំនួន២ទីតាំង។
កាសែតជប៉ុន Asahi បានចុះផ្សាយព័ត៌មានដោយដកស្រង់ប្រភពអនាមិក ថា រដ្ឋាភិបាលរបស់នាយករដ្ឋមន្ត្រីជប៉ុន ស៊ូហ្កា យូស៊ីហ៊ីដេ ទំនងជាអនុម័តតាមការស្នើសុំរបស់ក្រុមប្រឹក្សាសន្តិសុខជាតិជប៉ុន នៅមុនពេលដាច់ឆ្នាំ២០២០ លើគម្រោងបំពាក់ប្រព័ន្ធរ៉ាដា Aegis ។ ទោះបីជាបែបនេះក្តី ការសម្រេចចិត្តបំពាក់ប្រព័ន្ធរ៉ាដាទំនើបនេះលើនាវាចម្បាំងប្រភេទណា ឬការចាយវាយលើការបំពាក់នេះ នឹងត្រូវយកទៅគិតគូរនាឆ្នាំ២០២១។
ការបំពាក់ប្រព័ន្ធរ៉ាដា «Aegis» ថ្មីលើនាវា អាចមានតម្លៃលើសទ្វេដង បើធៀបនឹងប្រព័ន្ធរ៉ាដាដែលបំពាក់លើមូលដ្ឋានទ័ពផ្ទាល់ដី ហើយក៏ចំណាយពេលយូរជាង៣ឆ្នាំផងដែរក្នុងការបំពាក់។ យោងតាមការចុះផ្សាយរបស់ទីភ្នាក់ងារព័ត៌មាន Reuters តម្លៃរបស់វា រំពឹងឈានដល់២ពាន់លានដុល្លារឯណោះ។
ប្រព័ន្ធរ៉ាដា Aegis ដែលអភិវឌ្ឍក្រុមហ៊ុនអាមេរិក Lockheed Martin ជាការប្រើប្រាស់កុំព្យូទ័រដ៏មានឥទ្ធិពល និងបច្ចេកវិទ្យារ៉ាដាក្នុងការតាមចាប់និងស្ទាក់ចាប់មីស៊ីលសត្រូវ ក៏ដូចជាបាញ់មីស៊ីលកម្ទេចសត្រូវវិញផងដែរ។ ក្រៅពីអាមេរិក និងជប៉ុន យោធាអេស្ប៉ាញ អូស្ត្រាលី ន័រវែស និងអូស្ត្រាលី ក៏ប្រើប្រាស់ប្រព័ន្ធនេះ។ អង្គការយោធាណាតូ ក៏មានប្រើប្រព័ន្ធមីស៊ីលនេះដែរ។
គួររម្លឹកផងដែរថា ក្នុងខែមិថុនាកន្លងទៅ រដ្ឋមន្ត្រីការពារកាលនោះ លោក Taro Kono បានសម្រេចផ្អាកផែនការដាក់ពង្រាយប្រព័ន្ធរ៉ាដា Aegis នៅមូលដ្ឋានទ័ពផ្ទាល់ដី ចំនួន២កន្លែង ដោយលើកហេតុផលថា ការបាញ់ស្ទាក់មីស៊ីលអាចធ្លាក់ចូលផ្ទះពលរដ្ឋជប៉ុន។
ប្រព័ន្ធរ៉ាដាស៊េរីថ្មីចុងក្រោយ « SPY-7» ដែលជប៉ុនគ្រោងបំពាក់លើនាវាសង្គ្រាមខ្លួន នឹងមានកម្លាំងខ្លាំងជាង៣ដង បើធៀបនឹងប្រព័ន្ធរ៉ាដាស៊េរីចាស់ ដែលនាវាសង្គ្រាមជប៉ុនបច្ចុប្បន្នកំពុងប្រើប្រាស់។ ការដំឡើងនេះ នឹងអនុញ្ញាតឲ្យជប៉ុនប្រើប្រាស់មីស៊ីលបាញ់ស្ទាក់ក្បាលគ្រាប់មីស៊ីលសត្រូវ ជាពិសេស ប្រសិនបើបាញ់ចេញដោយកូរ៉េខាងជើង ឬពីមូលដ្ឋានឯទៀត ដូចជា ចិន និងរុស្ស៊ី ជាដើម៕
© រក្សាសិទ្ធិដោយ thmeythmey.com