ជាតិ
កល្យាណ មានន័យថា ល្អ រីឯកល្យាណី ជាស្ត្រីមានលំអ ឬនាងល្អ 16, Dec 2020 , 7:29 am
× តាមវចនានុក្រមសម្តេចព្រះសង្ឃរាជ ជួន ណាត «កល្យាណ» ជាគុណសព្ទ ដែលមានន័យថា ល្អ, ដែលមានលំអ។ រីឯនាមសព្ទ កល្យាណី មានន័យថា ស្ត្រីមានលំអ, នាងល្អ។
កល្យាណកម្ម មានន័យថា អំពើល្អ, កុសលកម្ម ដែលផ្ទុយពីលាមកកម្ម។ កល្យាណការី ជាជនអ្នកធ្វើអំពើល្អ, អ្នកធ្វើការកុសល ។ ស្ត្រីជា កល្យាណការិនី ។ កល្យាណមិត្ត ជា មិត្តល្អ, មិត្តត្រឹមត្រូវដែលបុគ្គលគួរសេពគប់ គួររាប់រកយកជាគ្នា ដោយផ្ទុយពីពាក្យ បាបមិត្ត ។
កល្យាណី ជាស្ត្រីមានលំអ, នាងល្អ។ ស្ត្រីកល្យាណី, កែវកល្យាណី, មាសកល្យាណី ដោយភាគច្រើនប្រើនៅក្នុងពាក្យកាព្យ។ បញ្ចពិធកល្យាណី សំដៅលើ ស្ត្រីដែលមានលម្អ៥យ៉ាងគឺ លម្អសក់, លម្អបបូរមាត់, លម្អធ្មេញ, លម្អសម្បុរ, លម្អវ័យ ។
អតិកល្យាណ ឬ អតីកល្យាណី (បើជាស្ត្រី) មានន័យថា មានលម្អក្រៃពេក៕
© រក្សាសិទ្ធិដោយ thmeythmey.com