COVID-19
អន្តរជាតិ
ប៉េរូ ជាប្រទេសទី១៦លើលោកដែលមានករណីឆ្លងកូវីដ-១៩លើសពី១លាន
23, Dec 2020 , 7:29 pm
×![]()
ដោយ: រួបរួម
គិតត្រឹមថ្ងៃទី២៣ ខែធ្នូ នេះ ប៉េរូ មានអ្នកឆ្លងកូវីដ-១៩ លើស១លានករណី ខណៈទូទាំងពិភពលោកមានជាង៧៨.៣៦លានករណី ក្នុងនោះស្លាប់ជាង១.៧២លាននាក់ និងសះស្បើយជាង៥៥.១២លាននាក់។
ប៉េរូ ចូលរួមជាមួយប្រទេស១៥ ទៀតដែលមានអ្នកឆ្លងជាង១លានករណី។ សហរដ្ឋអាមេរិក មានជាង១៨.៦៨លានករណី និងតាមពីក្រោយដោយឥណ្ឌា (ជាង១០លាន), ប្រេស៊ីល (ជាង៧លាន) និងរុស្ស៊ី (ជិត៣លាន)។
ប្រទេសដែលមានករណីឆ្លងក្នុងរង្វង់២លានករណី មានដូចជាបារាំង ចក្រភពអង់គ្លេស និងតួកគី ខណៈអ៊ីតាលី និងអេស្ប៉ាញ ឡើងជិត២លានរៀងៗខ្លួន។ អាល្លឺម៉ង់ អាហ្សង់ទីន និងកូឡុំប៊ី មានជាង១.៥លាន ខណៈជាង១លានករណី មាននៅម៉ិកស៊ីក ប៉ូឡូញ អ៊ីរ៉ង់ និងប៉េរូ។
អ៊ុយក្រែន និងអាហ្វ្រិកខាងត្បូង មានជាង៩០ម៉ឹនករណីរៀងៗ រីឯហូឡង់ មានជាង៧០ម៉ឺន ឥណ្ឌូណេស៊ី សាធារណរដ្ឋឆេក និងបែលហ្ស៊ិក មានជាង៦០ម៉ឺន។ ប្រទេសផ្សេងទៀតដែលករណីឆ្លងជាង៥០ម៉ឺន រួមមាន រូម៉ានី ស៊ីលី អ៊ីរ៉ាក់ កាណាដា និងបង់ក្លាដែស។
ក្នុងចំណោមអ្នកស្លាប់ជាង១.៧២លាននាក់ សហរដ្ឋអាមេរិក មានជាង៣៣ម៉ឺននាក់ ប្រេស៊ីលជាង១៨ម៉ឺននាក់ ឥណ្ឌាជាង១៤ម៉ឺននាក់ និងម៉ិកស៊ិកជិត១២ម៉ឺននាក់។ អ៊ីតាលី និងចក្រភពអង់គ្លេស មានអ្នកស្លាប់ជិតដល់៧ម៉ឺននាក់ ខណៈអ៊ីរ៉ង់ និងរុស្ស៊ី មានជាង៥ម៉ឺននាក់៕
© រក្សាសិទ្ធិដោយ thmeythmey.com
