ជាតិ
នយោបាយជាតិ
តុលាការ ចោទលោក សម រង្ស៊ី ពីបទប្រមាថព្រះមហាក្សត្រ ជាលើកទី៣ តាមអធិបញ្ជាពីក្រសួងយុត្តិធម៌ 28, Dec 2020 , 11:44 am
រូបពីAFP
× ភ្នំពេញ៖ តុលាការ បានចោទប្រកាន់លោក សម រង្ស៊ី មេដឹកនាំអតីតគណបក្សសង្គ្រោះជាតិ ពីបទប្រមាថព្រះមហាក្សត្រជាផ្លូវការ នៅថ្ងៃទី២៨ ធ្នូ នេះ តាមអធិបញ្ជារបស់ក្រសួងយុត្តិធម៌។ នេះជាលើកទី៣ហើយ ដែលលោក សម រង្ស៊ី រងបទចោទប្រមាថ ព្រះមហាក្សត្រ។
រដ្ឋមន្ត្រីក្រសួងយុត្តិធម៌ លោក កើត រិទ្ធ បានអធិបញ្ជាឲ្យតុលាការចាត់វិធានការច្បាប់លើលោក សម រង្ស៊ី មេដឹកនាំអតីតគណបក្សសង្គ្រោះជាតិជាបន្ទាន់ ចំពោះការប្រើពាក្យប្រមាថព្រះចេស្តាព្រះមហាក្សត្រ កាលពីថ្ងៃទី២៥ ធ្នូ ។ លោក កើត រិទ្ធ ចេញអធិបញ្ជានេះ ក្រោយពីពិនិត្យឃើញលោក សម រង្ស៊ី ប្រើពាក្យប្រមាថព្រះមហាក្សត្រថា «ស្ដេចទីមោង» នៅលើហ្វេសប៊ុកខ្លួន កាលពីថ្ងៃទី២០ ធ្នូ។
រដ្ឋមន្ត្រីក្រសួងយុត្តិធម៌ ចាត់ទុកការប្រើពាក្យមិនគួរគប្បីរបស់លោក សម រង្ស៊ី មកលើអង្គព្រះមហាក្សត្រនោះ ជាការប្រមាថយ៉ាងធ្ងន់ធ្ងរ ដែលមិនអាចអត់ឱនបាន។
កាលពីខែឧសភា ឆ្នាំ២០១៩ ចៅក្រមនៃសាលាដំបូងរាជធានីភ្នំពេញ បានប្រកាសសាលក្រម ដោយសម្រេចឲ្យលោក សម រង្ស៊ី មេដឹកនាំអតីតគណបក្សសង្គ្រោះជាតិ ជាប់ពន្ធនគារ៤ឆ្នាំម្ដងហើយ ពីបទ ប្រមាថព្រះមហាក្សត្រ។ រយៈពេល៤ខែក្រោយមក ពោលគឺនៅខែ កញ្ញា ឆ្នាំ២០១៩ លោក សម រង្ស៊ី បានរងបទប្រមាថព្រះមហាក្សត្រម្ដងទៀត ។
មាត្រា៧ នៃជំពូកទី២ ក្នុងរដ្ឋធម្មនុញ្ញកម្ពុជា ស្តីអំពីព្រះមហាក្សត្រ បានចែងថា «ព្រះមហាក្សត្រ ទ្រង់គ្រងរាជ្យសម្បត្តិ ប៉ុន្តែមិនកាន់អំណាចឡើយ។ ព្រះមហាក្សត្រទ្រង់ជាប្រមុខរដ្ឋមួយជីវិត។ អង្គព្រះមហាក្សត្រ មិនអាចឲ្យអ្នកណាបំពានបានឡើយ»។
មាត្រា៤៣៧ស្ទួន នៃក្រមព្រហ្មទណ្ឌ ស្តីពីការប្រមាថព្រះមហាក្សត្រ ចែងថា ការប្រមាថ គឺជាវាចា កាយវិការ សំណេរ គំនូរ ឬវត្ថុដែលប៉ះពាល់ដល់សេចក្តីថ្លៃថ្នូរនៃបុគ្គល។ ការប្រមាថចំពោះអង្គព្រះមហាក្សត្រ ត្រូវផ្ទន្ទាទោសដាក់ពន្ធធនាគារពី១ឆ្នាំ ទៅដល់៥ឆ្នាំ និងពិន័យជាប្រាក់២លានរៀល ដល់១០លានរៀល។ ចំពោះនីតីបុគ្គល ដែលសំដៅលើអង្គភាព ស្ថាប័ន អង្គការ ឬក្រុមហ៊ុន ជាដើម អាចនឹងត្រូវពិន័យជាប្រាក់ពី ១០លានរៀល ទៅ៥០លានរៀល ព្រមទាំងទោសផ្សេងៗទៀត ក្នុងករណីប្រមាថព្រះមហាក្សត្រ៕
© រក្សាសិទ្ធិដោយ thmeythmey.com