កីឡាជាតិ
ជាតិ
NOCC នឹងរៀបចំព្រឹត្តិការណ៍កីឡានៅខេត្តព្រះសីហនុ ដើម្បីស្រោចស្រង់វិស័យទេសចរណ៍ ក្នុងវិបត្តិកូវីដ-១៩
04, Jan 2021 , 4:21 pm
លោក_វ៉ាត់_ចំរើន_អគ្គលេខាធិការនៃគណៈកម្មាធិការអូឡាំពិកកម្ពុជា
×![]()
គណៈកម្មាធិការជាតិអូឡាំពិកកម្ពុជា(NOCC)សហការជាមួយក្រសួងទេសចរណ៍នឹងរៀបចំព្រឹត្តិការណ៍កីឡាប្រណាំងកង់ រត់ប្រណាំង និងប្រណាំងម៉ូតូទឹក ដើម្បីជួយស្រោចស្រង់ និងផ្សព្វផ្សាយពីសក្តានុពលទេសចរណ៍ក្នុងខេត្តព្រះសីហនុ នាអំឡុងខែកុម្ភៈ ខាងមុខនេះ។ ការបង្ហាញពីសោភ័ណភាពសក្តានុពលហេដ្ឋារចនាសម្ព័ន្ធក្នុងខេត្តនេះ ក៏ជាគោលបំណងមួយផងដែរ។ 
អគ្គលេខាធិការនៃគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន បានបង្ហាញពីគម្រោងក្នុងការរៀបចំព្រឹត្តិការណ៍កីឡាទេសចរណ៍មួយចំនួននៅខេត្តព្រះសីហនុ នាអំឡុងខែកម្ភៈ ឆ្នាំ២០២១។ គោលបំណងនៃការរៀបចំព្រឹត្តិការណ៍នេះ គឺដើម្បីជួយផ្សព្វផ្សាពីសក្តានុពលទេសចរណ៍ និងប្រតិបត្តិករទេសចរក្នុងខេត្តព្រះសីហនុ ដែលបានរងផលប៉ះពាល់ដោយសារវិបត្តិកូវីដ-១៩ និងវត្តមានជនជាតិចិនដ៏ច្រើនលើសលប់ កាលពីពេលកន្លងទៅ។
ក្នុងបទសម្ភាសជាមួយសារព័ត៌មានថ្មីៗ លោក វ៉ាត់ ចំរើន បានបញ្ជាក់យ៉ាងដូច្នេះថា៖«តាមការចង្អុលបង្ហាញរបស់ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានឲ្យគណៈកម្មាធិការជាតិអូឡាំពិកកម្ពុជា ជាមួយក្រសួងទេសចរណ៍ពិនិត្យលទ្ធភាពនៅថ្ងៃទី១៤ កុម្ភៈ ឆ្នាំ២០២១ រៀបចំឲ្យមានព្រឹត្តិការណ៍កីឡា ដើម្បីជួយដល់សកម្មភាពប្រតិបត្តិករទេសចរណ៍ និងសេវាទេសចរណ៍ឡើងវិញ»។
ក្រៅពីផ្សព្វផ្សាយពីសក្តានុពលទេសចរណ៍កោះ និងឆ្នេរខ្សាច់ដ៏ស្រស់ស្អាតជាងគេនៅកម្ពុជា ការបង្ហាញសោភ័ណភាពដ៏ស្រស់ស្អាតផ្នែកហេដ្ឋារចនាសម្ព័ន្ធក្នុងខេត្តព្រះសីហនុ ក៏ស្ថិតក្នុងគោលបំណងនៃការរៀបចំព្រឹត្តិការណ៍កីឡាទេសចរណ៍នេះផងដែរ។ គួររម្លឹកថា រាជរដ្ឋាភិបាលកម្ពុជាបានបញ្ចេញថវិកាប្រមាណ២៩៤លានដុល្លារ ដើម្បីសាងសង់ផ្លូវចំនួន៣៤ខ្សែក្នុងក្រុងព្រះសីហនុ និងខេត្តព្រះសីហនុ។ ផ្លូវទាំង៣៤ខ្សែនេះ បានបើកការដ្ឋានសាងសង់កាលពីពាក់កណ្តាលខែវិច្ឆិកា ឆ្នាំ២០១៩។
បើតាមលោក វ៉ាត់ ចំរើន ប្រភេទកីឡា ដែលគ្រោងរៀបចំនៅខេត្តព្រះសីហនុរួមមានរត់ប្រណាំង ប្រណាំងកង់ និងប្រណាំងម៉ូតូទឹកជាដើម។ តែយ៉ាងណា លោក អះអាងថា គម្រោងនេះមិនទាន់សម្រេច១០០ភាគរយនៅឡើយទេ ពោលគឺកំពុងស្ថិតក្នុងការវាយតម្លៃ និងសិក្សាពីលទ្ធភាពក្នុងការរៀបចំ។
នេះមិនមែនជាលើកទី១នោះទេ ដែល NOCC សហការជាមួយក្រសួងទេសចរណ៍រៀបចំព្រឹត្តិការណ៍កីឡាក្នុងខេត្តជាប់មាត់សមុទ្រមួយនេះ ពោលគឺភាគីទាំងពីរធ្លាប់រៀបចំព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិ ប្រណាំងកង់អន្តរជាតិ និងព្រឹត្តិការណ៍កីឡាជាច្រើនទៀត ពិសេសបុណ្យសមុទ្រ។
ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិនៅខេត្តព្រះសីហនុ ដែលធ្វើឡើងរៀងរាល់បុណ្យទិវាសិទ្ធិនារី ៨ មីនា ត្រូវបានផ្អាកការរៀបចំនៅឆ្នាំ២០១៩ ដោយសារខ្វះដៃគូឧបត្ថម្ភ។ ក្រៅពីរត់ប្រណាំងនៅឆ្នេរអូឈើទាល និងផ្លូវមួយចំនួនក្នុងក្រុងព្រះសីហនុ ព្រឹត្តិការណ៍កីឡាទេសចរណ៍នេះ ក៏មានរៀបចំការប្រណាំងកង់អន្តរជាតិក្នុងនោះដែរ៕
Tag:
ក្រសួងទេសចរណ៍
វ៉ាត់ ចំរើន
NOCC
© រក្សាសិទ្ធិដោយ thmeythmey.com
