អន្តរជាតិ
អ្នកគាំទ្រលោក ត្រាំ ចូលអុកឡុកវិមានសភា, ស្ត្រីបាតុករម្នាក់ស្លាប់
07, Jan 2021 , 10:09 am
បាតុករគាំទ្រប្រធានាធិបតី ដូណាល់ ត្រាំ ចូលអុកឡុកសភា។ រូបថត AFP
×![]()
ដោយ: តន ចាន់រិទ្ធារ៉ា
អ្នកគាំទ្រលោក ដូណាល់ ត្រាំ បានសម្រុកចូលវិមានសភាអាមេរិក ទីដែលសមាជិកសភាទាំងពីរថ្នាក់កំពុងប្រជុំដើម្បីបញ្ជាក់ជ័យជម្នះរបស់លោក ចូ បៃឌិន ។ ស្ត្រីម្នាក់ត្រូវបានរាយការណ៍ថា ស្លាប់នៅមន្ទីរពេទ្យក្រោយត្រូវបានបាញ់ក្នុងពេលចលាចលនៅថ្ងៃទី៦ ខែមករា។ លោក បៃឌិន បានរិះគន់ការចូលអុកឡុក ខណៈលោក ត្រាំ បានប្រាប់ឲ្យអ្នកគាំទ្ររក្សារបៀបរៀបរយ។ មេដឹកនាំពិភពលោកជាច្រើន ក៏បង្ហាញការខកចិត្តចំពោះអ្វីដែលកើតនៅប្រទេសប្រជាធិបតេយ្យមួយនេះ។
កិច្ចប្រជុំរួមគ្នារបស់សភាតំណាង និងព្រឹទ្ធសភាអាមេរិក ត្រូវបានផ្អាកភ្លាមៗក្រោយក្រុមបាតុករដែលជាអ្នកគាំទ្រលោកប្រធានាធិបតី ដូណាល់ ត្រាំ ចូលអុកឡុក។ កិច្ចប្រជុំនេះ មានគោលដៅរាប់ចំនួនប្រតិភូដែលគាំទ្របេក្ខជនប្រធានាធិបតី ដែលនេះគ្រាន់តែជានីតិវិធីផ្លូវការប៉ុណ្ណោះ ព្រោះអ្នកឈ្នះត្រូវបានដឹងឮអស់ទៅហើយ គឺលោក ចូ បៃឌិន មកពីបក្សប្រជាធិបតេយ្យ។
ពីដំបូង អ្នកគាំទ្រលោក ត្រាំ រាប់ពាន់នាក់បានជួបគ្នាខាងក្រៅវិមានកាពីតូលក្នុងរដ្ឋធានីវ៉ាស៊ីនតោន ទម្លុះរនាំងការពារ រួចក៏បានប៉ះទង្គិចជាមួយក្រុមប៉ូលិសដែលការពារវិមាន។ បន្ទាប់មក ក្រុមបាតុករ ក៏ចូលដល់ក្នុងអាគារសភា ដោយអុកឡុកនៅតាមបន្ទប់នានា ហើយប៉ុនប៉ងសម្រុកចូលសាលប្រជុំសភាទៀតផង។ ក្រុមប៉ូលិសក៏បានបាញ់ឧស្ម័នបង្ហូរទឹកភ្នែកដើម្បីបំបែកក្រុមបាតុករ ខណៈសមាជិកសភាទាំងអស់ ត្រូវបានណែនាំពាក់ឧបករណ៍ការពារ និងជម្លៀសទៅកាន់កន្លែងសុវត្ថិភាព។
អភិបាលរដ្ឋធានីវ៉ាស៊ីនតោន Muriel Bowser បានដាក់បម្រាមគោចរក្នុងទីក្រុងចាប់ពីម៉ោង៦ល្ងាច (ម៉ោងអាមេរិក)។ កងឆ្មាំការពារជាតិ កម្លាំងពិសេស FBI និងទីភ្នាក់ងារសម្ងាត់ ក៏ត្រូវបានពង្រាយនៅវិមានកាពីតូលដើម្បីទ្រទ្រង់ស្ថានការណ៍។ អនុប្រធានាធិបតីអាមេរិក ម៉ៃ ផេន ដែលដឹកនាំកិច្ចប្រជុំ ត្រូវបានជម្លៀសចេញពីអាគារតាមផ្លូវក្រោមដី ខណៈសមាជិកសភា និងមន្ត្រីជាច្រើនទៀត ត្រូវនាំទៅកន្លែងមានសុវត្ថិភាពនៃបរិវេណវិមានកាពីតូល។
លោកប្រធានាធិបតីជាប់ឆ្នោត បៃឌិន បានហៅសកម្មភាពនេះជាការបះបោរ មិនមែនជាការតវ៉ាឡើយ។ ចំណែកលោក ត្រាំ វិញ ក៏ចេញសារតាម Twitter ដោយប្រាប់ឲ្យអ្នកគាំទ្ររក្សាអហិង្សា និងស្នើឲ្យពួកគេចេញពីវិមានកាពីតូល។ លោកក៏ឆ្លៀតសរសើរពួកគេថា៖ «អ្នកពិតជាពិសេសណាស់។»
ក្នុងការសម្រុកចូលអាគារនេះ ស្ត្រីម្នាក់ត្រូវបានប៉ូលិសបាញ់ ហើយបានស្លាប់នៅមន្ទីរពេទ្យ។ នេះបើតាមការបញ្ជាក់របស់ប៉ូលិសទីក្រុងវ៉ាស៊ីនតោន។ សាក្សីម្នាក់ប្រាប់ទូរទស្សន៍ WUSA ថា ពេលកំពុងសម្រុកចូលសភា ស្ត្រីវ័យក្មេងម្នាក់ រត់សំដៅបង្អូច ឯប៉ូលិស និងភ្នាក់ងារពិសេសប្រាប់នាងឲ្យថយក្រោយវិញ។ ដោយសារនាងមិនស្ដាប់តាម ព្រមគ្នានឹងប្រទាញប្រទង់ផង គ្រាប់កាំភ្លើងក៏ហោះសំដៅករបស់នាងតែម្ដង។
ក្រោយប៉ូលិសគ្រប់គ្រងស្ថានការណ៍បានហើយ សភាទាំងពីរ ក៏បានបន្តកិច្ចប្រជុំរបស់ខ្លួនបន្តទៀតដើម្បីរាប់សំឡេងគាំទ្ររបស់លោក បៃឌិន ។ លោក បៃឌិន នឹងស្បថចូលកាន់តំណែងនៅថ្ងៃទី២០ ខែមករា។
មេដឹកនាំប្រទេសជាច្រើន បានប្រតិកម្មទៅនឹងសកម្មភាពជ្រុលនិយមនេះ។ នាយករដ្ឋមន្ត្រីអង់គ្លេស បូរីស ចនសុន ចាត់ទុកទង្វើនេះជារឿងអាម៉ាស់។ ចំណែកនាយករដ្ឋមន្ត្រីកាណាដា ចាស្ទីន ទ្រូដូ វិញ បង្ហាញក្ដីបារម្ភលើអំពើហិង្សានេះ និងសង្ឃឹមថា គ្រប់យ៉ាងនឹងវិលត្រឡប់ទៅរកប្រក្រតីភាពវិញ។
រដ្ឋមន្ត្រីការបរទេសអាល្លឺម៉ង់ ហៃកូ ម៉ាស និយាយថា សត្រូវរបស់ប្រជាធិបតេយ្យ កំពុងអស់សំណើចនឹងអ្វីដែលកើតឡើងនៅអាមេរិក ហើយស្នើឲ្យលោក ត្រាំ ទទួលយកលទ្ធផលបរាជ័យ។ ក្នុងសារលើ Twitter រដ្ឋមន្ត្រីការបរទេសបារាំង Jean-Yves Le Drian ការវាយប្រហារលើស្ថាប័នអាមេរិក ជាការវាយប្រហារប្រជាធិបតេយ្យ ហើយឆន្ទៈរបស់ប្រជាជនអាមេរិក ត្រូវតែត្រូវបានគោរព៕
Tag:
អាមេរិក
ដូណាល់ ត្រាំ
ចូ បៃឌិន
© រក្សាសិទ្ធិដោយ thmeythmey.com
