ជាតិ
អាជ្ញាធរខណ្ឌដូនពេញ ឃាត់ខ្លួនមនុស្ស១៣នាក់ ដែលបន្ទោបង់នៅសួនសាធារណៈ
19, Jan 2021 , 4:20 pm
×![]()
ដោយ: ឡាយ សុភាវតី
ភ្នំពេញ៖ អាជ្ញាធរខណ្ឌដូនពេញ បានឃាត់ខ្លួនក្រុមអ្នកបើកម៉ូតូឌុប និងម៉ូតូកង់បី១៣នាក់ ដែលបន្ទោបង់នៅតាមដើមឈើ និងសួនច្បារសាធារណៈ ដើម្បីយកទៅអប់រំណែនាំ ។ នេះបើតាមរដ្ឋបាលខណ្ឌដូនពេញ បានចេញផ្សាយលើហ្វេសប៊ុកផ្លូវការខ្លួន នៅថ្ងៃទី១៩ មករា។
ក្រុមការងារអាជ្ញាធរខណ្ឌ បានចុះពិនិត្យសណ្ដាប់ធ្នាប់សាធារណៈតាមមូលដ្ឋាន ដោយបានជួបក្រុមម៉ូតូឌុបនិងម៉ូតូកង់បី ឈប់យាន្តជំនិះ ដើម្បីបន្ទោបង់នៅតាមដើមឈើ និងសួនច្បារសាធារណៈ ។ ក្រោយឃើញសកម្មភាពបែបនេះ អាជ្ញាធរខណ្ឌដូនពេញ ក៏សម្រេចឃាត់ខ្លួនពួកគេតែម្ដង។ រដ្ឋបាលខណ្ឌ បានសង្កត់ធ្ងន់ថា «ការធ្វើ(បន្ទោរបង់)បែបនេះគឺបណ្ដាលឲ្យ បាត់បង់សណ្តាប់ធ្នាប់ របៀបរៀបរយ និងបង្ករអោយក្លិនឆ្អេះឆ្អាប ដល់អ្នកធ្វើដំណើរ»។
ការឃាត់ខ្លួននេះ អាជ្ញាខណ្ឌធ្វើឡើងក្នុងគោលបំណងណែនាំអប់រំ និងតម្រូវឲ្យអ្នកទាំងនោះ បាញ់ទឹកលាងសម្អាតកន្លែងបន្ទោបង់របស់ខ្លួននៅទីសាធារណៈនោះ។ បន្ទាប់ពីអប់រំនិងលាងសម្អាតរួម អាជ្ញាធរខណ្ឌដូនពេញ ក៏បានដោះលែងពួកគេវិញ។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញ បានអះអាងថា អាជ្ញាធរតែងតែចុះពិនិត្យសណ្ដាប់ធ្នាប់ និងណែនាំពីបញ្ហាបន្ទោបង់នេះ នៅតាមគ្រប់ខណ្ឌកន្លងមក ប៉ុន្តែពលរដ្ឋខ្លះ នៅតែប្រព្ព្រឹត្តផ្ទុយពីបម្រាម។ លោក ភក្តី អះអាងថា អាជ្ញាធរ នឹងបន្តចាត់វិធានការនេះទៀត ដោយមិនឲ្យពលរដ្ឋបន្ទោបង់នៅសួនច្បារសាធារណៈទេ ព្រោះវាជារឿងអនាធិបតេយ្យ ដែលធ្វើឲ្យសណ្ដាប់ធ្នាប់សាធារណធ្លាក់ចុះ។
អ្នកនាំពាក្យរូបនេះ ក៏អំពាវនាវដល់ពលរដ្ឋទាំងអស់ ត្រូវបន្ទោរបង់ឲ្យបានត្រឹមត្រូវនៅកន្លែងសមរម្យតាមបន្ទប់សាធារណៈ។ លោកបន្តថា ការធ្វើបែបនេះ គឺជាការចូលរួមចំណែកថែរក្សាសណ្ដាប់ធ្នាប់សង្គម៕
Tag:
សណ្ដាប់ធ្លាប់សាធារណៈ
© រក្សាសិទ្ធិដោយ thmeythmey.com
