សហគ្រិនខ្មែរ គឺជាស្ថាប័នក្រោមចំណុះក្រសួងសេដ្ឋកិច្ច និងហិរញ្ញវត្ថុ (MEF) និង EnergyLab ដែលជាអ្នកបណ្តុះបណ្តាលធុរកិច្ចបង្កើតថ្មីក្នុងវិស័យថាមពលស្អាតតែមួយគត់នៅប្រទេសកម្ពុជា បានចុះហត្ថលេខាលើកិច្ចព្រមព្រៀងភាពជាដៃគូដើម្បីគាំទ្រដល់ធុរកិច្ចបង្កើតថ្មីផ្នែកថាមពលស្អាតក្នុងវិស័យកសិកម្ម នេសាទ និងវារីវប្បកម្មនៅក្នុងប្រទេសកម្ពុជា ដោយទទួលបានកញ្ចប់ថវិការជំនួយពីសហភាពអឺរ៉ុប។
ភាពជាដៃគូនេះមានគោលបំណងលើកកម្ពស់គំនិតអាជីវកម្មរបស់សហគ្រិនផ្នែកថាមពលស្អាតក្នុងការអភិវឌ្ឍផលិតផលប្រកួតប្រជែង ដែលឆ្លើយតបទៅនឹងតម្រូវការថាមពលរបស់សហគ្រាសកសិជលផលនៅតំបន់បឹងទន្លេសាប។ EnergyLab នឹងជ្រើសរើសធុរកិច្ចបង្កើតថ្មីផ្នែកថាមពលស្អាត ចំនួន ៥-១០ ក្នុងមួយឆ្នាំ ដើម្បីចូលរួមក្នុងកម្មវិធីបណ្តុះបណ្តាលធុរកិច្ចបង្កើតថ្មី រយៈពេល ១ ឆ្នាំ ដើម្បីណែនាំអាជីវកម្មទាំងនោះ ជាមួយនឹងការបណ្ដុះបណ្ដាលយ៉ាងដិតដល់ ការណែនាំ និងការប្រឹក្សាយោបល់មួយទល់នឹងមួយ ។
សហគ្រិនខ្មែរនឹងផ្តល់ថវិកា “ជំនួយវិនិយោគដំបូង” ទៅដល់ធុរកិច្ចបង្កើតថ្មីដែលត្រូវបានជ្រើសរើស សម្រាប់ការបង្កើតគំរូផលិតផលសាកល្បង ផ្នែកលក់ ផ្នែកទីផ្សារ និងយុទ្ធសាស្ត្រអភិវឌ្ឍន៍អាជីវកម្ម។
លោកបណ្ឌិត ឈៀង វណ្ណមុនិណ្ណ នាយកប្រតិបត្ដិនៃសហគ្រិនខ្មែរ បានមានប្រសាសន៍ថា ដោយមានការគាំទ្រពីក្រសួងសេដ្ឋកិច្ចនិងហិរញ្ញវត្ថុ សហគ្រិនខ្មែរមានចក្ខុវិស័យដើម្បីក្លាយជាថ្នាលជាតិសម្រាប់លើកកម្ពស់វិស័យសហគ្រិនភាពនៅកម្ពុជា។ លោកបណ្ឌិតបានបន្តថា៖ “ភាពជាដៃគូនេះមានភាពសមស្របទៅនឹងការគាំទ្រដល់ប្រព័ន្ធអេកូឡូស៊ីសហគ្រិនភាព និងជាវិស័យអាទិភាពមួយរបស់សហគ្រិនខ្មែរ ដែលមានវិស័យកសិ-ឧស្សាហកម្ម ក្នុងបំណងចង់បង្កើត វិនិយោគ និងគាំទ្រអាជីវកម្មដែលទទួលបានជោគជ័យនៅក្នុងវិស័យនេះ។ តាមរយៈកម្មវិធីនេះ ធុរកិច្ចបង្កើតថ្មីអាចទទួលបានការគាំទ្រដែលពួកគេត្រូវការ ដើម្បីកែប្រែគំនិតអាជីវកម្មទៅជាអាជីវកម្មជាក់ស្តែង និងភាពរីកចម្រើន ក៏ដូចជាទាក់ទាញការវិនិយោគទុនផងដែរ។ សហគ្រិនខ្មែរមានបំណងជួយទាក់ទាញអ្នកវិនិយោគផ្សេងៗដើម្បីទទួលបានជោគជ័យក្នុងរយៈពេលវែង។”
កម្មវិធីបណ្តុះបណ្តាលធុរកិច្ចបង្កើតថ្មីបស់ EnergyLabគឺជាផ្នែកមួយនៃកម្មវិធី “SWITCH to Solar” ដែលទទួលបានថវិកាតាមរយៈកម្មវិធីជំនួយ SWITCH-Asia របស់សហភាពអឺរ៉ុប ដឹកនាំដោយ People in Need និងរួមសហការជាមួយក្រុមហ៊ុន
Sevea។
លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា បានមានប្រសាសន៍ថា៖ “ការគាំទ្ររបស់យើងនឹងជួយជម្រុញឱ្យសហគ្រិនកម្ពុជាអភិវឌ្ឍបច្ចេកវិទ្យាបៃតងថ្មី និងបង្កើតដំណោះស្រាយជំនួញ សម្រាប់វិស័យកសិកម្មវារីវប្បកម្ម និងនេសាទ។ នវានុវត្ដន៍ដោយប្រើថាមពលស្អាតនៅក្នុងខ្សែចង្វាក់គុណតម្លៃអាចជួយអាជីវកម្មនៅតំបន់ជនបទពង្រីកអាជីវកម្មរបស់ខ្លួន ពង្រឺងភាពប្រកួតប្រជែង និងក្រាលថ្នាលសម្រាប់ការរើបឡើងនៃសេដ្ឋកិច្ចដោយផ្អែកលើបច្ចេកវិទ្យាបៃតង។”
កម្មវិធីបណ្ដុះបណ្ដាលធុរកិច្ចបង្កើតថ្មីផ្នែកថាមពលស្អាតក្នុងវិស័យកសិកម្ម និងវារីវប្បកម្មគាំទ្រសហគ្រិនចំនួន ៧ នាក់ដំបូងដែលកំពុងអភិវឌ្ឍន៍អាជីវកម្ម ដើម្បីបង្កើនផលិតកម្មវារីវប្បកម្ម និងកសិកម្ម និងបង្កើនប្រសិទ្ធភាពតម្លៃក្រោយប្រមូលផល ដូចជាការក្លាស្សេ ឬការសម្ងួតដោយពន្លឺព្រះអាទិត្យ។ ធុរកិច្ចបង្កើតថ្មីមួយដែលត្រូវបានជ្រើសរើសក៏កំពុងធ្វើការលើឧបករណ៍ស្រូបពន្លឺព្រះអាទិត្យដើម្បីបង្កើនផលិតភាពនៃកសិដ្ឋានចិញ្ចឹមត្រី។ លោក ស៊ុម វី នៃក្រុមហ៊ុន Agricultural Techniqueមានប្រសាសន៍ថា៖ “ខ្ញុំជឿជាក់ថាបច្ចេកវិទ្យានេះអាចផ្លាស់ប្តូរការអនុវត្តនៅក្នុងវិស៍័យវារីវប្បកម្មបច្ចុប្បន្ននៅក្នុងប្រទេសកម្ពុជា។ វានឹងជួយកសិករបង្កើនទិន្នផល និងបង្កើតប្រាក់ចំណូលបន្ថែមទៀត។”
លោក Antoine Denizart នាយកនៃគម្រោង SWITCH to Solar របស់ EnergyLab បានមានប្រសាសន៍ថា៖ “ការសហការជាមួយសហគ្រិនខ្មែរ អនុញ្ញាតឱ្យយើងអភិវឌ្ឍកម្មវិធីបណ្ដុះបណ្ដាលរបស់យើង និងបង្កើនវឌ្ឍនភាពរបស់ធុរកិច្ចថ្មី ដើម្បីឆ្ពោះទៅរកភាពជោគជ័យ”។ ឱកាសក្នុងការបង្កើតតម្លៃជាមួយដំណោះស្រាយថាមពលស្អាតក្នុងវិស័យកសិកម្ម និងវារីវប្បកម្មមានច្រើនលើសលប់ ប៉ុន្ដែគម្រោងទាំងនេះមានភាពស្មុគស្មាញ និងដំណោះស្រាយអាជីវកម្មល្អមានចំនួនតិចតួចក្នុងប្រទេសកម្ពុជា។ ពួកយើងមានសេចក្ដីសោមន្សរីករាយក្នុងការសហការជាមួយសហគ្រិនខ្មែរ ពីព្រោះតែការគាំទ្រពីសហគ្រិនខ្មែរនឹងជួយសហគ្រិនក្នុងការចាប់យកឪកាសទីផ្សារ ក្នុងខណៈបន្ធូរបន្ថយហានិភ័យក្នុងដំណើរការនវានុវត្ដន៍របស់ពួកគេ។”
កម្មវិធីបណ្ដុះបណ្ដាលអាជីវកម្មថាមពលស្អាតក្នុងវិស័យកសិកម្ម និងវារីវប្បកម្មលើកទី ២ នឹងចាប់ផ្តើមទទួលយកពាក្យនៅខែសីហា ឆ្នាំ ២០២១ ។
(អត្ថបទពាណិជ្ជកម្ម)