នៅក្នុងខែតុលា ឆ្នាំ២០២១ តួកគី បានស្នើសុំទិញយន្តហោះចម្បាំង F-16 និងគ្រឿងបរិក្ខារយន្តហោះចម្បាំងផ្សេងទៀត ក្នុងទំហំប្រមាណ ២០ពាន់លានដុល្លារ ពីក្រុមហ៊ុន Lockheed Martin Corp។ 

 

ក្រោយរង់ចាំជិតរយៈពីរឆ្នាំ រដ្ឋបាលអាម៉េរិក បានប្រកាសបន្តនីតិវិធីទៅមុខលើការដឹកជញ្ជូនយន្តហោះ F-១៦ ឱ្យតួកគី។ មុនកិច្ចប្រជុំមេដឹកនាំអង្គការណាតូ នៅលីទុយអានី លោក Jake Sullivan ទីប្រឹក្សាសន្តិសុខជាតិអាម៉េរិក បានអះអាងថា លោកចូ បៃឌិន ប្រធានាធិបតីអាម៉េរិក បានបញ្ជាក់យ៉ាងច្បាស់ ដោយលោកគាំទ្រលើការផ្ទេរយន្តហោះចម្បាំងប្រភេទនេះ​ឱ្យតួកគី។ 

 

បើតាមមន្រ្តីសេតវិមានរូបនេះ លោកបៃឌិន មិនមានការជំទាស់អ្វីឡើយ ហើយលោកមានបំណងបន្តនីតិទៅមុខលើការដឹកជញ្ជូនយន្តហោះចម្បាំងនោះ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

ការប្រកាសបែបនេះ ធ្វើឡើងក្រោយតួកគី បានឯកភាពដាក់សំណើចូលជាសមាជិកអង្គការណាតូរបស់ស៊ុយអែតទៅសភារបស់ខ្លួន ដើម្បីពិនិត្យ និងឈានដល់ការផ្តល់សច្ចាប័នចូលជាសមាជិក។ 

 

កន្លងមក នៅពេលហ្វាំងឡង់ចូលជាសមាជិកចូលជាសមាជិកសម្ព័ន្ធយោធាណាតូ ក្រោយការបើកផ្លូវរបស់តួកគី រដ្ឋាភិបាលក្រុងវ៉ាស៊ីនតោនក៏បានឯកភាពលក់គ្រឿងបរិក្ខារយោធាឱ្យក្រុងអង់ការ៉ាផងដែរ ដើម្បីកែលម្អ និងអភិវឌ្ឍសមត្ថភាពយន្តហោះ F-16 ដែលមានស្រាប់។​ 

 

ចំណែកប្រធានគណៈកម្មាធិការទំនាក់ទំនងបរទេសរបស់ព្រឹទ្ធសភាអាម៉េរិក លោក Bob Menendez ដែលធ្លាប់ជំទាស់លើការលក់យន្តហោះប្រភេទនេះឱ្យតួកគី បានអះអាងថា លោកកំពុងចរចាជាមួយរដ្ឋបាលរបស់លោកបៃឌិន ដើម្បីលក់យន្តហោះប្រភេទនេះ។ ជុំវិញបញ្ហាខាងលើ សមាជិកព្រឹទ្ធសភារូបនេះ អាចនឹងធ្វើសេចក្តីសម្រេចនៅសប្តាហ៍ក្រោយ៕