តាមរយៈ «ការទូតដើមឬស្សី» វៀតណាម ទទួលជោគជ័យខ្លាំងលើការពង្រឹងទំនាក់ទំនងជាមួយអាម៉េរិក និងចិន ដោយមេដឹកនាំក្រុងវ៉ាស៊ីនតោន និងក្រុងប៉េកាំង បានបំពេញទស្សនកិច្ចទៅវៀតណាមជាបន្តបន្ទាប់ ដើម្បីរឹតចំណងទ្វេភាគី សេដ្ឋកិច្ច និងកិច្ចសហប្រតិបត្តិផ្នែកការពារជាដើម។ បើទោះលោកស៊ី ជិនភីង ប្រធានាធិបតីចិន បានបំពេញទស្សនកិច្ចនៅក្រុងហាណូយ នៅសប្តាហ៍មុន ប៉ុន្តែអាម៉េរិកថា មិនប៉ះពាល់បែបអវិជ្ជមានដល់ទំនាក់ទំនងរវាងខ្លួន និងវៀតណាមឡើយ។ 

 

«ទំនាក់ទំនងរបស់យើងមិនពាក់ព័ន្ធនឹងប្រទេសទីបីទេ»។ អ្នកនាំពាក្យស្ថានទូតអាម៉េរិកប្រចាំនៅវៀតណាម លោក Cameron Thomas-Shah បានសង្កត់ធ្ងន់បែបនេះ ដោយបន្តថា រដ្ឋាភិបាលក្រុងវ៉ាស៊ីនតោន មានកិច្ចសហប្រតិបត្តិការជាមួយក្រុងហាណូយលើវិស័យជាច្រើនដូចជា សុខាភិបាល អប់រំ បច្ចេកវិទ្យា និងពាណិជ្ជកម្មជាដើម ហើយប្រទេសទាំងពីរ នឹងបន្តបន្ថែមទៀតនៅពេលអនាគត។ 

 

ក្នុងដំណើរទស្សនកិច្ចរបស់លោកស៊ីនៅក្រុងហាណូយ វៀតណាម និងចិន បានប្តេជ្ញាចំពោះកិច្ចសហប្រតិបត្តិការសន្តិសុខ រួមទាំងឧស្សាហកម្មផ្នែកការពារ និងការដឹកជញ្ជូន។ 

 

ដោយឡែក សម្រាប់វត្តមានរបស់លោកប្រធានាធិបតី ចូ បៃឌិន នៅវៀតណាមកន្លងទៅ ភាគីទាំងពីរ បានដំឡើងកម្រិតទំនាក់ទំនងទៅភាពជាដៃគូយុទ្ធសាស្រ្តគ្រប់ជ្រុងជ្រោយ ដែលជាកម្រិតដ៏ខ្ពស់បំផុត។ ការដំឡើងឋានៈបែបនេះ ធ្វើឱ្យអាម៉េរិកមានកម្រិតទំនាក់ទំនងជាមួយវៀតណាម ស្មើនឹងចិនដែរ។ 

 

ជុំវិញទំនាក់ទំនងខាងលើ លោក Carl Thayer អ្នកជំនាញសន្តិសុខវៀតណាម នៃបណ្ឌិត្យសភាកម្លាំងការពារអូស្រ្តាលី បានយល់ឃើញថា ការពង្រឹងកិច្ចសហប្រតិបត្តិការរវាងវៀតណាម និងចិន មិនអាចប៉ះពាល់ដល់កិច្ចសហប្រតិបត្តិការការពាររវាងក្រុងហាណូយ និងក្រុងវ៉ាស៊ីនតោនឡើយ៕