ដំណើរការបំពាក់កៅអីមានបង្អែកនៅពហុកីឡដ្ឋានជាតិអូឡាំពិក ដើម្បីឱ្យស្របតាមគោលការណ៍សហព័ន្ធកីឡាបាល់ទាត់អន្តរជាតិ (FIFA) និងអាស៊ី (AFC) ជិតរួចរាល់១០០ភាគរយហើយ។ មិនទាន់បញ្ចប់ក៏ពិតមែន ប៉ុន្តែនៅទីតាំងកៅអីក្នុងពហុកីឡដ្ឋានដែលមានអាយុកាល៦០ឆ្នាំ បានប្រែរូបរាងថ្មីបណ្តើរៗជាមួយរចនាបថខ្មែរ ដែលរំលេចដោយក្បាច់ផ្កាចន្ទន៍។
គំរូប្លង់កៅអីកីឡដ្ឋានថ្មី របស់លោក ហោ មណីឬទ្ធិ ត្រូវបានសហព័ន្ធកីឡាបាល់ទាត់កម្ពុជា (FFC) ជ្រើសរើសជាជ័យលាភី ហើយយកទៅកែសម្រួលខ្លះមុនសម្រេចយកទៅប្រើប្រាស់លើការបំពាក់កៅអីចាប់ពីថ្ងៃទី១៨ ខែមករា។ មុនសម្រេចយកគំរូប្លង់របស់ និស្សិតឆ្នាំទី៣ ជំនាញរចនា នៅសកលវិទ្យាល័យលីមកុកវីង ស្ថាប័ន FFC បានប្រកាសរកអ្នកចង់បញ្ចេញស្នាដៃលើការរចនាប្លង់ក្នុងកីឡដ្ឋាន ដោយទទួលបានអ្នកចូលរួមប្រជែងជាច្រើនដល់ទៅជាង១០០ស្នាដៃ។
គំរូប្លង់របស់ និស្សិតមណីឬទ្ធិ ដែលចំណាយពេលវេលានៅពេលទំនេរធ្វើនៅរៀងរាល់ពេលយប់ (ដោយគិតជាម៉ោងប្រមាណ៤៨ម៉ោង) ទទួលបានការចុច Like ច្រើនដាច់គេ។ និស្សិតឆ្នាំទី៣ រូបនេះ បានបញ្ជាក់ប្រាប់សារព័ត៌មានឌីជីថលថ្មីៗថា ខ្លួនបានជ្រើសរើសយករចនាបថក្បាច់ផ្កាចន្ទន៍ និងពណ៌ចំនួនបី រួមមាន ស ក្រហម និងខៀវ ដែលជាពណ៌តំណាងឱ្យទង់ជាតិកម្ពុជា និងអក្សរ ពហុកីឡដ្ឋានជាតិ ដើម្បីគូប្លង់មួយនេះឡើង។
មណីឬទ្ធិ ពន្យល់ពីអត្តន័យនៃគំរូប្លង់ពហុកីឡដ្ឋានជាតិរបស់ខ្លួនដូច្នេះថា អក្សរ «ពហុកីឡដ្ឋានជាតិ» រំលេចចេញជាអក្សរពណ៌ ស នៅចំផ្នែកកណ្ដាលនៃពណ៌ក្រហម និង ពណ៌ខៀវ លាយបញ្ចូលគ្នាដែលជាពណ៌តំណាងឱ្យទង់ជាតិប្រទេសកម្ពុជា។ ហើយពុម្ភអក្សរដែលយកមកប្រើប្រាស់សម្រាប់ អក្សរ «ពហុកីឡដ្ឋានជាតិ» ជាពុម្ពអក្សរដែលបានរៀបចំឡើងតំណាងឱ្យ អក្សរបាលីនៅក្នុងភាសាខ្មែរ ដែលបានរចនាឡើងជា ពិសេសសម្រាប់បកប្រែអក្សរបាលីជាប្រព័ន្ធអក្សរខ្មែរ ជាពុម្ពអក្សរបាលី ដែលអាចអានបាន និងជាទូទៅមាននៅក្នុងសាត្រាស្លឹករឹត និងអក្សរសិល្ប៍។
ដោយឡែក ក្បាច់ផ្កាចន្ទន៍ ពណ៌ ស នៅសងខាងអក្សរ ពហុកីឡដ្ឋានជាតិ មណីឬទ្ធិ អះអាងថា ខ្លួនរចនាឡើង ដើម្បីបង្ហាញពីវប្បធម៌ដ៏សម្បូរបែបរបស់កម្ពុជា។ ការប្រើប្រាស់ផ្កាចន្ទន៍មានជាទូទៅក្នុងទម្រង់សិល្បៈផ្សេងៗ រួមទាំងស្ថាបត្យកម្ម វាយនភណ្ឌ និងសិប្បកម្ម ដែលឆ្លុះបញ្ចាំងពីទំនៀមទម្លាប់ និងការបង្ហាញសិល្បៈដ៏ជ្រាលជ្រៅរបស់ខ្មែរ។
ឆ្លើយនឹងសំណួរថាតើហេតុអ្វី សម្រេចជ្រើសយកក្បាច់ផ្កាចន្ទន៍ ដើម្បីរចនាប្លង់កៅអីនេះ ស្របពេលខ្លួនស្គាល់អំពីរចនាបថខ្មែរផ្សេងៗជាច្រើនទៀត មណីឬទ្ធិ តបថា ដោយសាររូបគេបានសាកល្បងបញ្ចូលរចនាបថមួយចំនួនចូលហើយ ប៉ុន្តែមានតែក្បាច់ផ្កាចន្ទន៍នេះប៉ុណ្ណោះ ដែលស័ក្តិសម នឹងប្រវែង និងទំហំពហុកីឡដ្ឋាននេះ។
ក្រោយទទួលការជ្រើសរើសពី FFC និស្សិតផ្នែករចនា វ័យ២០រូបនេះ មានក្តីរីករាយ និងមោទកភាពយ៉ាងខ្លាំង ដោយសារគំរូប្លង់របស់ខ្លួនត្រូវបានយកទៅដំឡើងតាមកៅអីកីឡដ្ឋាន ដែលបានសាង់ឡើងដោយ លោក វណ្ណ ម៉ូលីវណ្ណ ដែលគេទទួលស្គាល់ថាជាស្ថាបត្យករខ្មែរដ៏ល្បីឈ្មោះ។
ពហុកីឡដ្ឋានដែលចេញប្លង់ដោយបិតាស្ថាបត្យករ វណ្ណ មូលីវណ្ណ សាងសង់ឡើងដើម្បីធ្វើជាម្ចាស់ផ្ទះកីឡាអាស៊ីអាគ្នេយ៍ឆ្នាំ១៩៦៣។ ប៉ុន្តែដោយសា្ថនភាពនយោបាយក្នុងប្រទេស កម្ពុជខកឱកាសរៀបចំព្រឹត្តិការណ៍នេះ ដោយត្រូវរង់ចាំ៧០ឆ្នាំក្រោយគឺឆ្នាំ២០២៣ ទើបកម្ពុជា បានរៀបចំព្រឹត្តិការណ៍ស៊ីហ្គេមលើកទី៣២។ ព្រឹត្តិការណ៍ស៊ីហ្គេមលើកទី៣២ ពហុកីឡាដ្ឋានជាតិបានទទួលព្រឹត្តិការណ៍ប្រកួតកីឡាជាច្រើនប្រភេទផងដែរ។ ពហុកីឡដ្ឋានជាតិអូឡាំពិក មិនដែលបានឃើញល្បែងកីឡាអូឡាំពិកទេ ប៉ុន្តែមានឈ្មោះថាអូឡាំពិក នោះដ៏ព្រោះតែនៅពេលស្តាតនេះសង់រួចរាល់នាឆ្នាំ១៩៦៤ វាគឺជាកីឡដ្ឋានធំជាងគេនៅតំបន់អាស៊ីអាគ្នេយ៍។
ពហុកីឡាដ្ឋានជាតិអូឡាំពិក ដែលចាប់ផ្តើមសាងសង់ឆ្នាំ១៩៦២ បានទទួលព្រឹត្តិការណ៍ធំៗជាច្រើន ហើយក៏ជាសំណង់ដែលពោរពេញទៅដោយប្រវត្តិជាច្រើន។ ពហុកីឡាដ្ឋានជាតិអូឡាំពិកមានផ្លាកអនុស្សាវរីយប្រវត្តិសាស្ត្រមួយ ធ្វើពីលោហធាតុ និងមានខ្នាតប្រហែល ១០០ លើ ៨០ សង់ទីម៉ែត្រ។ ផ្ទាំងដែកនេះ មានខ្លឹមសារជាភាសាខ្មែរ និងជាភាសាបារាំងថា នៅទីនេះ នាថ្ងៃទី ១ ខែកញ្ញា ឆ្នាំ ១៩៦៦ លោកឧត្តមសេនីយ សាល ដឺហ្គោល ប្រធានាធិបតីនៃសាធារណរដ្ឋបារាំង ដោយមានវត្តមាន សម្ដេចព្រះ នរោត្តម សីហនុ ព្រះប្រមុខរដ្ឋ ព្រះបរមរតនកោដ្ឋ បានថ្លែងព្រះរាជសុន្ទរកថាជាប្រវត្តិសាស្ត្រមួយ ដែលគេប្រសិទ្ធិនាមថា «សុន្ទរកថានាក្រុងភ្នំពេញ» ។
រូបភាព៖ FFC
ដើមចមដែលបណ្តាលឱ្យមានការរចនាប្លង់ដ៏ស្រស់ស្អាត លើសំណង់ចាស់អាយុកាល៦០ឆ្នាំនេះ ដោយសារសហព័ន្ធកីឡាបាល់ទាត់កម្ពុជា ត្រូវធ្វើតាមលក្ខខណ្ឌរបស់ AFC និង FIFA ដើម្បីអាចឱ្យពហុកីឡដ្ឋានជាតិអូឡាំពិក ទទួលធ្វើជាម្ចាស់ផ្ទះក្នុងការប្រកួតអន្តរជាតិបាន។ តម្រូវការនោះ គឺធ្វើយ៉ាងណាឱ្យកីឡដ្ឋានដែលអាចផ្ទុកទស្សនិកជន៣ម៉ឺននាក់នេះ មានកៅអីដែលមានបង្អែក។ កន្លងមក ដែលកីឡដ្ឋាននេះមានត្រឹមកៅអីអត់បង្អែក តែអាចទទួលរៀបចំស៊ីហ្គេម និងការប្រកួតអន្តរជាតិមួយចំនួន ក៏ដោយសារ FFC ទទួលបានការអនុគ្រោះពី AFC ប៉ុណ្ណោះ។ បើមានកៅអីផ្អែក បានន័យថា FFC មិនបាច់ពិបាកស្នើសុំ AFC ទៀតឡើយ នៅពេលរៀបចំប្រកួតអន្តរជាតិ។
សម្រាប់ដំណើរការបំពាក់កៅអីថ្មីទាំងនេះ FFC បានស្នើទៅសហព័ន្ធកីឡាបាល់ទាត់អាស៊ាន (AFF) ដើម្បីសុំកញ្ចប់ថវិកាឧបត្ថម្ភ។ ទីបំផុត AFF បានទម្លាក់ប្រាក់មួយចំនួន និងមួយចំនួនទៀត ចេញពីហោប៉ៅរបស់ FFC ផ្ទាល់៕