COVID-19
អន្តរជាតិ
ទីក្រុងប៉េកាំងបិទខណ្ឌមួយ បន្ទាប់ពីរកឃើញកូវីដ-១៩ ចំនួន៦ករណី 20, Jan 2021 , 5:41 pm
ប្រជាជនចិន តម្រង់ជួររង់ចាំការធ្វើតេសត្តក្នុងខណ្ឌ Daxing ទីក្រុងប៉េកាំង។ រូបថត Xinhua
× អាជ្ញាធរចិន នៅថ្ងៃទី២០ ខែមករា បានប្រកាសបិទខណ្ឌ Daxing នៅក្នុងទីក្រុងប៉េកាំង ដើម្បីទប់ស្កាត់ការរាតត្បាតកូវីដ-១៩ ។ តាមរយៈចំណាត់ការនេះ ប្រជាជនរស់នៅក្នុងសង្កាត់ចំនួន ១,៦លាននាក់ មិនត្រូវបានអនុញ្ញាតឲ្យចាកចេញពីតំបន់នេះឡើយ ទាល់តែធ្វើតេស្ត ឬមានការអនុញ្ញាតជាមុន។
ក្រុងប៉េកាំង បានរាយការណ៍កូវីដ-១៩ ចំនួន ៧ករណីនៅថ្ងៃទី២០ ខែមករា ដោយក្នុងនោះ ៦ករណីមាននៅក្នុងខណ្ឌ Daxing។ ដើម្បីទប់ស្កាត់ការរាតត្បាត អាជ្ញាធរបានសម្រេចបិទតំបន់នេះតែម្តង ចំណែកប្រជាជន១,៦លាននាក់ ក៏មិនអនុញ្ញាតឲ្យចាកចេញដែរ ទាល់តែមានការអនុញ្ញាតពីអាជ្ញាធរ ឬមានលទ្ធផលអវិជ្ជមានក្នុងរយៈពេល ៣ថ្ងៃជាមុនសិន។
ជាមួយនេះ អាជ្ញាធរទីក្រុងប៉េកាំងក៏បានដាក់ចេញវិធានការផ្សេងទៀតផងដែរដូចជា ហាមឃាត់ការជួបជុំលើសពី ៥០នាក់, ពិធីអាពាហ៍ពិពាហ៍ត្រូវលើកពេល ចំណែកពិធីបុណ្យសព អនុញ្ញាតឲ្យធ្វើក្នុងទ្រង់ទ្រាយតូច។ ទន្ទឹមនេះ ថ្នាក់មតេយ្យ និងសាលាបឋមក្នុងខណ្ឌ Daxing ក៏បានប្តូរឲ្យទៅរៀនតាមប្រព័ន្ធអនឡាញវិញដែរ។
មួយរយៈចុងក្រោយនេះ ករណីឆ្លងកូវីដ-១៩ នៅចិន បានហក់ឡើងវិញ។ នៅថ្ងៃទី ២០ ខែមករា ចិន បានរកឃើញករណីឆ្លងចំនួន ១០៣ករណី។ បញ្ហានេះ បានធ្វើអាជ្ញាធរក្នុងក្រុងប៉េកាំង ក៏ដូចជានៅតំបន់ផ្សេងទៀត បានដាក់ចេញចំណាត់ការជាបន្តបន្ទាប់។ អាជ្ញាធរក្នុងប៉េកាំង បានប្រកាសថា នឹងបើកការស៊ើបអង្កេតលើអ្នកដែលត្រលប់មកពីបរទេសទាំងអស់ចាប់ពីថ្ងៃទី១០ ខែធ្នូ និងបិទស្ថានីយរថភ្លើងក្រោមដីមួយកន្លែងផងដែរ។
លើសពីនេះ ចិន បានពន្លឿនការសាងសង់កន្លែងដាក់ចត្តាឡីស័កនៅក្នុងក្រុងស៊ីចាឆ័ង ខេត្តហឺប៉ីដែរ។ ក្រុងចំនួនពីរ ក្នុងខេត្ត Jilin ក្រោមវិធានរឹតត្បិតផងដែរ។
គិតត្រឹមថ្ងៃទី២០ ខែមករា ចិនមានករណីឆ្លងសរុបចំនួន ៨៨៥៥៧ករណី និងអ្នកស្លាប់មានចំនួន ៤៦៣៥នាក់។ ចំណែកអ្នកជាសះស្បើយមានចំនួន ៨២៤៤៩នាក់៕
© រក្សាសិទ្ធិដោយ thmeythmey.com