អ្នកស្រី ឡុក សុដានី នៅតែរក្សារថយន្តបុរាណម៉ាក AUSTIN Champ ដែលជាមរតកពីឪពុក

ជាតិ

រថយន្ត

04, Jul 2022 , 7:59 pm

រូបភាព

បាត់ដំបង៖ អ្នកស្រី ឡុក សុដានី ទទួលរថយន្ដមួយដ៏ប្លែកមិនធម្មតា ជាមរតកពីឪពុករបស់គាត់។ តាមកាតគ្រីស គឺជាម៉ាកអូស្តាំង ដែលជាអតីត ម៉ាកអង់គ្លេស។ តាមការស្រាវជ្រាវ វា ជាប្រភេទ Champ ហើយឡានប្រភេទនេះ ត្រូវបានផលិតក្នុងចំនួនតិចតួចប៉ុណ្ណោះ កាលពី៧០ឆ្នាំមុន។ ជាពិសេសម៉ូឌែលសម្រាប់ជនស៊ីវិល ដូចរថយន្តនេះ គឺកម្រមានណាស់។

ឪពុករបស់អ្នកស្រី សុដានី បានទិញវា នៅឆ្នាំ១៩៩០ ពេលធ្វើដំណើរពីក្រុងបាត់ដំបង ទៅស្រុកមង្គលបុរី នៅខេត្តបន្ទាយមានជ័យ។ ពេលនោះ AUSTIN Champនេះ ជារថយន្ដបុរាណហើយ។ វាបំពាក់ផ្លាកលេខចាស់ពីភ្នំពេញ ហើយមិនមានច្រើនទេ ឡានដែលបានរួចខ្លួនពីសង្គ្រាម។ អ្នកស្រី សុដានី ចង់ចាំជានិច្ចថា ឪពុករបស់ខ្លួនស្រលាញ់រថយន្តនេះណាស់ ទោះជាគេសុំទិញក៏មិនព្រមលក់ដែរ។ បើតាមអ្នកស្រី សុដានី ឪពុករបស់គាត់ បានជួសជុលវាផ្ទាល់ដៃតាមអាចធ្វើបាន។ គាត់បានកែដែកកាងខាងក្រោយ និងបន្ថែមកៅស៊ូការពារភក់ខាងក្រោយដែរ។ ពេលនេះនៅខ្វះរង្វង់តុបតែងកង់ទាំង៤ និងកង់សឺកួរ។ រហូតដល់ប្រហែល១២ឆ្នាំមុន វាអាចជិះបាន។

ដើម្បីជ្រាបច្បាស់ សូមលោកអ្នកនាង ទស្សនាវីដេអូខាងក្រោមនេះ៖

រីឯ AUSTIN Champ ម៉ូឌែលស៊ីវិលមួយទៀត ប្រហែលជាត្រូវបានបាត់បង់ ក៏ប៉ុន្តែមុនសង្គ្រាម វាមានប្រវត្តិដ៏មិនធម្មតាសោះ។ ជំនាន់នោះគឺជាកម្មសិទ្ធិផ្ទាល់របស់សម្តេចព្រះរៀម នរោត្តម បុប្ផាទេវី តែម្ដង។ លើសពីនេះទៅទៀត ព្រះបាទសម្ដេចព្រះ នរោត្ដម សីហនុ បានជ្រើសរើសវា សម្រាប់ថតរឿងភាពយន្ដ អប្សរា ផលិតឆ្នាំ១៩៦៦ ដែលព្រះអង្គជាអ្នកដឹកនាំរឿង និងដែលសម្តេចព្រះរៀម នរោត្តម បុប្ផាទេវី សំដែងជាតួអង្គភរិយាតួឯក។ ក្នុងរឿងកុនរបស់ផលិតកម្ម DittoLtd នោះ AUSTIN Champ ជាកម្មសិទ្ធិរបស់តួទាហានជើងអាកាសមួយរូប ដែលគាត់បើកឡាននេះរហូត ទូទាំងរាជធានីភ្នំពេញ និងតាមខេត្តទៀត។ គឺជារថយន្ដមួយដ៏ល្អប្រសើរ ដើម្បីថតភាពយន្ដ ពីព្រោះអាចដកចេញ ទាំងដំបូលក្រណាត់កៅស៊ូ ទាំងកញ្ចក់ខាងមុខ ដែលធ្វើឱ្យស្រួលថតតួសំដែងពីក្រៅ។ លើសពីនេះទៅទៀត វាមិនមានទ្វារតែម្ដង។ មានកៅអី២ខាងមុខ និង២ខាងក្រោយ។ សូមបញ្ជាក់ថា ក្នុងរឿងភាពយន្ដ អប្សរា នេះ ក៏មានវត្តមានរបស់សម្តេច ស៊ីសុវត្ថិ ជីវន្ត័មុនីរក្ស ដែលជាព្រះបុត្រា ព្រះបាទ សម្តេចព្រះ ស៊ីសុវត្ថិ មុនីវង្ស។ ជាមួយរថយន្ដដដែល ស្របនឹងរឿងនេះ ក៏មានបទចម្រៀងមួយដែរ ដែលមានចំណងជើង ទស្សនាទីក្រុងភ្នំពេញ ច្រៀងដោយលោក ស៊ីន ស៊ីសាមុត និងអ្នកស្រី ម៉ៅ សារ៉េត។

អត្ថបទទាក់ទង

លោក សូវៀត រំឭកដំណើរផ្សងព្រេងដោយជិះឡាន LAND ROVER ប្រភេទDefender ផលិតឆ្នាំ១៩៧០

ម្ចាស់រថយន្តបុរាណនៅកម្ពុជានឹងជួបជុំគ្នាលើកទី២ នៅថ្ងៃទី៦កុម្ភៈ នៅស្ថានីយរថភ្លើងភ្នំពេញ

ក្រៅពីលក់វត្ថុចាស់ៗហាង Antique Cambodia ទទួលទិញលក់ឡានប្រភេទLand Cruiser និងDefender

យានដ្ឋាន EMC មានឯកទេសជួសជុលទាំងរថយន្តអគ្គិសនី និងរថយន្តបុរាណ

លោក ឌៀប សុទ្ធីរ ប្រើពេលជាង១ខែ ដើម្បីដូរស្បែកពូកឡានROLLS-ROYCE Silver Dawn បុរាណ

ទូតអង់គ្លេសនៅកម្ពុជា ចូលរួមកាត់បន្ថយការបំពុលបរិស្ថានដោយការប្រើរថយន្តអគ្គិសនី

AUSTIN Champ ត្រូវបានផលិតពីថ្ងៃទី១ ខែកញ្ញា ឆ្នាំ១៩៥១ រហូតដល់ខែឧសភា ឆ្នាំ១៩៥៦។ កាលពីដំបូង ត្រូវបានគ្រោងផលិតរថយន្ដប្រភេទនេះ ១៤ ០០០ គ្រឿង សម្រាប់យោធាអង់គ្លេស។ ក៏ប៉ុន្តែដោយសារវាថ្លៃពេក ត្រឹម ១៣ ០០០ គ្រឿង ត្រូវឈប់ផលិតទៀតហើយ។ AUSTIN Champ ម៉ូឌែលស៊ីវិលវិញ ត្រូវបានផលិតអស់ ៥០០គ្រឿងប៉ុណ្ណោះ រយៈពេល៣ឆ្នាំ ចាប់ពីចុងឆ្នាំ១៩៥២។ ស្ទើរតែទាំងអស់ ត្រូវបាននាំចេញទៅប្រទេសអូស្ត្រាលី។ បច្ចុប្បន្ននេះ នៅសល់តែ ២គ្រឿងប៉ុណ្ណោះ នៅប្រទេសអង់គ្លេស! តាមពិតម៉ូឌែលស៊ីវិល វាខុសពីម៉ូឌែលយោធាឆ្ងាយ។ ពីដំបូងមានតម្លៃត្រឹម ៧៥០ផោន ហើយចាប់ពីខែវិច្ឆិកា ឆ្នាំ១៩៥២ វាឡើងដល់ ១ ០០០ផោន។

Champ គឺជាពាក្យបារាំង ដែលមានន័យថា ស្រែ។ ឈ្មោះនេះបញ្ជាក់ថា រថយន្ដនេះអាចនាំទៅលំហែកាយ តាមផ្លូវលំបាកក៏បានដែរ។ AUSTIN ជាក្រុមហ៊ុនអង់គ្លេសបង្កើតឡើងឆ្នាំ១៩០៥ នៅទីក្រុង Longbridge ដោយលោក AUSTIN Herbert ។ ពេលបច្ចុប្បន្ននេះគឺជាកម្មសិទ្ធិរបស់ក្រុមសម្ព័ន្ធចិនមួយ ក៏ប៉ុន្តែត្រូវលែងផលិតរថយន្ដម៉ាក AUSTIN តាំងពីឆ្នាំ១៩៨៨មកម៉្លេះ៕