អន្តរជាតិ
រដ្ឋមន្រ្តីហិរញ្ញវត្ថុជប៉ុន នឹងបំពេញទស្សនកិច្ចនៅកម្ពុជា នាដើមឆ្នាំក្រោយ
27, Dec 2023 , 10:30 am
រដ្ឋមន្រ្តីហិរញ្ញវត្ថុជប៉ុន លោក Shunichi Suzuki ក្នុងសន្និសីទសារព័ត៌មានក្រោយកិច្ចប្រជុំក្រុមប្រទេស G20 នៅក្នុងខែកក្កដា ឆ្នាំ២០២៣។ រូបភាព AFP
×![]()
ដោយ: ធៀន ភារិន្ទ
រដ្ឋមន្រ្តីហិរញ្ញវត្ថុជប៉ុន លោក Shunichi Suzuki នឹងបំពេញទស្សនកិច្ចនៅកម្ពុជា និងស្រីលង្កា នៅក្នុងខែមករា ខាងមុខ។ ពេលមកដល់កម្ពុជា លោករដ្ឋមន្រ្តី នឹងធ្វើការជាមួយកម្ពុជាសម្រាប់ទំនាក់ទំនងកាន់តែជិតស្និទ្ធបន្ថែមទៀត បន្ទាប់ពីប្រទេសទាំងពីរមានទំនាក់ទំនងរយៈពេល ៧០ឆ្នាំ។
នៅក្នុងសន្និសីទសារព័ត៌មានមួយ ក្នុងថ្ងៃទី២៦ ខែធ្នូ លោក Shunichi Suzuki រដ្ឋមន្រ្តីហិរញ្ញវត្ថុជប៉ុន បានប្រកាសថា លោកនឹងបំពេញទស្សនកិច្ចនៅកម្ពុជា និងស្រីលង្កាចាប់ពីថ្ងៃទី៩ ខែមករា ដើម្បីពង្រឹងទំនាក់ទំនងជាមួយប្រទេសទាំងពីរ។
ក្នុងដំណើរទស្សនកិច្ចនៅកម្ពុជា លោក Shunichi នឹងធ្វើការជាមួយកម្ពុជាលើវិស័យជាច្រើន ដើម្បីពង្រឹងចំណងទំនាក់ទំនងទ្វេភាគី។
ដំណើរទស្សនកិច្ចនេះ ធ្វើឡើងបន្ទាប់ពីសម្តេច ហ៊ុន ម៉ាណែត បានបំពេញទស្សនកិច្ចនៅជប៉ុន ដើម្បីចូលរួមកិច្ចប្រជុំកំពូលអាស៊ាន-អាស៊ានរម្លឹកខួប ៥០ឆ្នាំ។
តាមទិន្នន័យរបស់ស្ថានទូតជប៉ុន នៅក្នុងខែកញ្ញាកន្លងទៅ គិតត្រឹមរយៈពេល១០ឆ្នាំចុងក្រោយ ការនាំចេញរបស់ជប៉ុន មកកម្ពុជាមានទំហំជាង ៣ពាន់លានដុល្លារ ខណៈកម្ពុជានាំទៅជប៉ុនមានទំហំជាង ១០ពាន់លានដុល្លារ។ ទំនិញ ដែលនាំទៅជប៉ុនមានដូចជា អាវ ស្បែកជើង ផលិតផលស្បែក និងផលិតផលអេឡិចត្រូនិច។
ពាក់ព័ន្ធនឹងជំនួយឥតសំណង ជប៉ុន បានផ្តល់ឱ្យកម្ពុជាប្រមាណ១,៥៨៥ពាន់លានដុល្លារ និងកម្ចី១,៥៦៧ ពាន់លានដុល្លារ ដោយគិតត្រឹមដំណាច់ខែមីនា ឆ្នាំ២០២២៕
Tag:
(ជប៉ុន
កម្ពុជា
ស្រីលង្កា)
© រក្សាសិទ្ធិដោយ thmeythmey.com
